នេះជាសេចក្តីសម្រេចទីប្រាំហើយដែលមហាសន្និបាតអង្គការសហប្រជាជាតិ (UNGA) អនុម័តតាំងពីរុស្ស៊ីឈ្លានពានអ៊ុយក្រែននៅចុងខែកុម្ភៈ។ ជាមួយសំឡេងគាំទ្រ៩៤ ក្នុងចំណោមរដ្ឋសមាជិក ១៩៣ ដំណោះស្រាយនោះសរសេរថា រុស្ស៊ីដែលលុកលុយប្រទេសជិតខាងខ្លួនត្រូវទទួលខុសត្រូវរាល់សកម្មភាពទាំងឡាយរបស់ខ្លួនដែលបំពានច្បាប់អន្តរជាតិ។

 

«រុស្ស៊ីត្រូវតែទទួលរាល់ផលវិបាកផ្លូវច្បាប់នៃគ្រប់ទង្វើខុសនឹងច្បាប់អន្តរជាតិរួមមានការផ្តល់សំណងសម្រាប់ការខូចខាតដែលបណ្តាលមកពីសកម្មភាពបែបនោះ»។ សេចក្តីសម្រេចរបស់មហាសន្និបាត UN បញ្ជាក់បែបនេះ ហើយក៏បានលើកឡើងពីតម្រូវការបង្កើតយន្តការអន្តរជាតិសម្រាប់ធ្វើការផ្តល់សំណងនេះដែរ។

 

បន្ថែមពីលើនេះ ដំណោះស្រាយដដែលក៏ចេញអនុសាសន៍ដល់ប្រទេសជាសមាជិកសហការជាមួយអ៊ុយក្រែនបង្កើតបញ្ជីអន្តរជាតិមួយដើម្បីចងក្រងឯកសារទាមទារ​ និងព័ត៌មានស្តីពីការខូចខាត ការបាត់បង់ ឬរបួសដែលបង្កដោយរុស្ស៊ីដល់ប្រជាជន និងរដ្ឋាភិបាលអ៊ុយក្រែន។

 

នេះជាសេចក្តីសម្រេចរបស់មហាសន្និបាតដែលទទួលបានគាំទ្រតិចបំផុតក្នុងចំណោមសេចក្តីសម្រេចកន្លងមក។ ខណៈរដ្ឋសមាជិកទាំងអស់មិនបានចូលរួមបោះឆ្នោត  ប្រទេសចំនួន១៤ បោះឆ្នោតប្រឆាំងរួមមានរុស្ស៊ី ចិន និងអ៊ីរ៉ង់ ហើយ៧៣ប្រទេសទៀតបោះឆ្នោតអនុបវាទរួមមានឥណ្ឌា ប្រេស៊ីល និងអាហ្វ្រិកខាងត្បូង។ 

 

ដោយឡែកស្ថានភាពនៅអ៊ុយក្រែនវិញ យោធាអ៊ុយក្រែនបានរំដោះ និងលើកទង់ជាតិអ៊ុយក្រែនឡើងវិញនៅទីក្រុង Kherson ដែលស្ថិតក្នុងដៃរុស្ស៊ីប្រហែលប្រាំបីខែមកនេះ។ ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី នៅថ្ងៃទី១៤ ខែវិច្ឆិកា ហៅជ័យជម្នះនេះជាចំណុចចាប់ផ្តើមនៃការបញ្ចប់សង្រ្គាម៕