កាលពីកិច្ចប្រជុំថ្នាក់រដ្ឋមន្រ្តីការបរទេស​ G20 កាលពីខែកក្កដា រដ្ឋមន្រ្តីការបរទេសរុស្ស៊ី ស៊ែហ្គេយ៍ ឡាវរ៉ូវ មិនមានវត្តមានក្នុងកិច្ចប្រជុំឡើយ នៅពេលរដ្ឋមន្រ្តីការបរទេសអ៊ុយក្រែន ឌីមីត្រូ គូលេបា ថ្លែងសុន្ទរកថាតាមប្រព័ន្ធអនឡាញ។ ដោយឡែកលើកនេះ ប្រមុខការទូតរុស្ស៊ីរូបនេះដែលអង្គុយនៅកៅអីរបស់ប្រធានាធិបតីរុស្ស៊ីបង្ហាញវត្តមានក្នុងកិច្ចប្រជុំ ហើយថែមទាំងឆ្លើយតបទៅវិញទៀត ក្រោយសុន្ទរកថាតាមប្រព័ន្ធអនឡាញរបស់ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី។ 

 

សង្រ្គាមនៅអ៊ុយក្រែនដែលអូសបន្លាយដល់ខែទីប្រាំបួនហើយនៅតែជាប្រធានបទដ៏ក្តៅគគុកក្នុងកិច្ចប្រជុំមេដឹកនាំ G20។ អំឡុងកិច្ចប្រជុំទីមួយដែលនិយាយពីសន្តិសុខថាមពល និងស្បៀង លោក ហ្សេលេនស្គី ឆ្លៀតលើកឡើងពីសង្រ្គាមនៅប្រទេសខ្លួនដែរ។ អ៊ុយក្រែនមិនមែនជាសមាជិកប្រទេស G20 ទេ តែត្រូវបានអញ្ជើញដោយឥណ្ឌូណេស៊ីដែលជាម្ចាស់ផ្ទះរៀបចំកិច្ចប្រជុំ។

 

«សង្រ្គាមគួរតែត្រូវបានបញ្ចប់ដោយយុត្តិធម៌ និងផ្អែកលើគោលការណ៍ធម្មនុញ្ញអង្គការសហប្រជាជាតិ និងច្បាប់អន្តរជាតិ»។ លោក ហ្សេលេនស្គី ថ្លែងបែបនេះដោយសំដៅលើរូបមន្តស្វែងរកសន្តិភាពនៅអ៊ុយក្រែននៅចំពោះមុខមេដឹកនាំ G20 តែត្រូវបានលោកហៅថាជាមេដឹកនាំ G19 ដោយមិនរាប់បញ្ចូលរុស្ស៊ី។ 

 

ក្នុងសុន្ទរកថារបស់ប្រធានាធិបតីអ៊ុយក្រែន លោកក៏បានបញ្ជាក់ដែរថា អ៊ុយក្រែនកំពុងធ្វើការជាមួយបណ្តារដ្ឋគាំទ្រដើម្បីផ្តល់មូលនិធិដល់ការដឹកជញ្ជូនធញ្ញជាតិថ្មី។ លោក ហ្សេលេនស្គី ព្រមទាំងអំពាវនាវ ដល់ប្រទេសទាំងអស់ ពិសេសមេដឹកនាំ G19 ឱ្យចូលរួមគំនិតផ្តួចផ្តើមនេះដើម្បីជួយផ្គត់ផ្គង់ស្បៀងអាហារដល់ប្រទេសក្រីក្រ។ 

 

យ៉ាងណាមិញ ទាក់ទងសង្រ្គាមនៅអ៊ុយក្រែន ប្រមុខការទូតរុស្ស៊ីឆ្លើយតបទៅវិញដូចដែលអះអាងកន្លងមកថា រុស្ស៊ីកំពុងប្រយុទ្ធប្រឆាំងពួកណាស៊ីជំនាន់ថ្មីនៅអ៊ុយក្រែនប៉ុណ្ណោះ។ អំឡុងសុន្ទរកថារបស់ប្រមុខកាទូតទាំងអ៊ុយក្រែន និងរុស្ស៊ីមិនមានអ្នកដើរចេញដូចកិច្ចប្រជុំថ្នាក់រដ្ឋមន្រ្តីកន្លងមកទេ។ 

 

សូមបញ្ជាក់ថា កិច្ចប្រជុំពីរទៀតដែលធ្វើឡើងអំឡុងកិច្ចប្រជុំកំពូល G20 នៅថ្ងៃទី១៥ និង១៦ ខែវិច្ឆិកានេះមានបញ្ហាទាក់ទងនឹងសុខភាពរួមមានការងើបឡើងវិញនៃសេដ្ឋកិច្ចក្រោយជំងឺកូវីដ-១៩ ជាដើម និងការផ្លាស់ប្តូរទៅរកឌីជីថល៕