អន្តរជាតិ
អាម៉េរិកនឹងចំណាយប្រាក់៦៦លានដុល្លារសាងសង់ហេដ្ឋារចនាសម្ព័ន្ធមូលដ្ឋានយោធានៅហ្វីលីពីន មូលដ្ឋានទ័ពជើងទឹកអាម៉េរិកនៅ Subic របសហ្វីលីពីន។ រូបថត Reuters
× ហ្វីលីពីន អះអាងនៅថ្ងៃទី១៥ វិច្ឆិកាថា អាម៉េរិកដែលជាសម្ព័ន្ធមិត្តយោធារបស់ខ្លួនបានយល់ព្រមផ្ដល់ប្រាក់៦៦,៥លានដុល្លារដើម្បីសាងសង់កន្លែងហ្វឹកហាត់សមយុទ្ធ និងឃ្លាំងផ្ទុកអាវុធនៅមូលដ្ឋានទ័ពនៅហ្វីលីពីនក្រោមកិច្ចព្រមព្រៀងសន្តិសុខរួមគ្នាឆ្នាំ ២០១៤។
បើតាមសេចក្ដីថ្លែងការណ៍របស់ក្រសួងការពារជាតិហ្វីលីពីន ការសាងសង់នៃគម្រោងមួយចំនួននៅមូលដ្ឋានយោធាអាម៉េរិកចំនួន៣ក្នុងចំណោម៥នៅហ្វីលីពីនក្រោមកិច្ចព្រមព្រៀងសហប្រតិបត្តិការពង្រឹងការការពារជាតិ (EDCA) នឹងចាប់ផ្ដើមនៅឆ្នាំក្រោយ។
«ក្រសួងការពារជាតិ ប្ដេជ្ញាចិត្តក្នុងការពន្លឿនការអនុវត្តគម្រោងនៃកិច្ចព្រមព្រៀង EDCA ដោយរួមបញ្ចូលការសាងសង់ហេដ្ឋារចនាសម្ព័ន្ធ និងគម្រោងជួសជុល ព្រមទាំងការអភិវឌ្ឍគម្រោងហេដ្ឋារចនាសម្ព័ន្ធថ្មីនៅទីតាំងដែលមានស្រាប់»។ ក្រសួងការពារជាតិហ្វីលីពីនបញ្ជាក់ក្នុងសេចក្ដីថ្លែងការណ៍ខាងលើបែបនេះ។
ហ្វីលីពីនជាសម្ព័ន្ធមិត្តយ៉ាងជិតស្និតជាមួយអាម៉េរិក ខណៈបារម្ភពីការបង្កើនឥទ្ធិពលក្នុង តំបន់សមុទ្រចិនខាងត្បូង។ ប្រទេសទាំងពីរមានសន្ធិសញ្ញាការពារជាតិដែលមានអាយុ៧០ឆ្នាំ ហើយធ្វើសមយុទ្ធរួមគ្នាជាច្រើនលើកក្នុងមួយឆ្នាំៗដែលរួមមានទាំងការហាត់បាញ់គ្រាប់ពិត ការវាយលុកក្នុងសមុទ្រ បេសកកម្មមនុស្សធម៌ និងសមយុទ្ធប្រឆាំងភេរវកម្ម។
កាលពីថ្ងៃទី១៤ ខែវិច្ឆិកា ប្រមុខយោធាហ្វីលីពីនលោក Bartolome Bacarro និយាយថា អាម៉េរិកបានស្នើការរួមបញ្ចូលមូលដ្ឋានយោធាចំនួនប្រាំបន្ថែមទៀតនៅក្នុង EDCA ប៉ុន្តែរង់ចាំការអនុម័តពីក្រសួងការពារជាតិ និងក្រសួងការបរទេសហ្វីលីពីន៕
© រក្សាសិទ្ធិដោយ thmeythmey.com