ប្រធានប្រតិភូលោក ឯក ម៉ាអូរ៊ី បានដឹកនាំគ្រូបង្វឹក-គ្រូជំនួយ៣រូប កីឡាករ២៥រូប និងកីឡាការិនី៦រូប ទៅចូលរួមការប្រកួតកីឡាទូកប្រពៃណីអន្តរជាតិ«ទូកនាគ»ជើងឯកអាស៊ីលើកទី១៤ នៅប្រទេសថៃ ដែលមាន១២ ប្រទេសចូលរួមប្រកួតប្រជែងក្នុងតំបន់អាស៊ី។

 

លោក គង់ សុភាព គ្រូជំនួយកីឡាទូកកម្ពុជាបាននិយាយថា ការចេញដំណើរទៅប្រកួតនៅទឹកដីថៃ គឺជាបន្ទាត់វាស់ស្ទង់កម្រិតសមត្ថភាពរបស់អត្តពលិកក្រុមជម្រើសជាតិកម្ពុជា ត្រៀមសម្រាប់ព្រឹត្តិការណ៍ស៊ីហ្គេមនៅកម្ពុជា ថ្វីដ្បិតបច្ចុប្បន្នកម្រិតសមត្ថភាពកីឡាករ-កីឡាការិនីកំពុងតែមានការកើនឡើងក្តី។

 

លោក សុភាព បន្តថា៖«យើងសង្ឃឹមថាការចេញដំណើរទៅចូលរួមប្រកួតលើកនេះ កីឡាករ-កីឡាការិនីកម្ពុជានឹងទទួលបានមេដាយ ព្រោះយើងបានតេស្តសាកល្បងកម្រិតសមត្ថភាពពួកគាត់រៀងរាល់ខែ ហើយមើលឃើញថាការអនុវត្តរបស់គាត់មានកម្លាំងហ្ស៊ូសច្រើន បូករួមមានគ្រូអន្តរជាតិជួយបង្ហាត់បង្ហាញផង»។ 

ការប្រកួតប្រណាំងទូកអន្តរជាតិ ជើងឯកអាស៊ីលើកទី១៤ (14th Asian Dragon Boat Championship 2022) នឹងចាប់ផ្តើមប្រកួតពីថ្ងៃទី១៧ ដល់ថ្ងៃទី២១ ខែវិច្ឆិកា ឆ្នាំ២០២២៕