ក្រោយបញ្ចប់ជំនួបនេះ ក្រសួងការបរទេស​ចិនក្នុង​សេចក្តីថ្លែងការណ៍​មួយបាន​និយាយថា ភាគី​ទាំងពីរនឹង​ប្រកាន់ខ្ជាប់​នូវ​ការ​ពិគ្រោះ​យោបល់គ្នាក្នុងនាមជាមិត្ត ​ដោះស្រាយ​ការខ្វែងគំនិត និង​ជម្លោះ​ឱ្យ​បាន​ត្រឹមត្រូវ។ លើសពីនោះ ចិនក៏បញ្ជាក់ថា ប្រទេសទាំងពីរគួរតែការរួមគ្នាដើម្បីបដិសេធទង្វើឯកតោភាគីនិយម និងការគំរាមកំហែង ក៏ដូចជាការពារយុត្តិធម៌ការពារសន្តិភាព និងស្ថិរភាពក្នុងតំបន់ផងដែរ។ 
 

យ៉ាងណាមិញ ចិនមិនបានបញ្ជាក់ឱ្យច្បាស់ពីទង្វើគំរាមនេះឡើយ ប៉ុន្តែកន្លងមកចិនតែងតែលើកឡើងថា អាម៉េរិកបានបង្កការគំរាមកំហែងក្នុងតំបន់សមុទ្រ​ចិន​ខាង​ត្បូង។

លើសពីនេះដែរ ក្រសួងការបរទេសហ្វីលីពីន នៅក្នុងសេចក្តីថ្លែងការណ៍មួយដែលចេញបន្ទាប់ពីបញ្ចប់ការប្រជុំ បាននិយាយថា មេដឹកនាំនៃប្រទេសទាំងពីរបានព្រមព្រៀងគ្នាថាបញ្ហាដែនសមុទ្រនឹងមិនគួរប៉ះទង្គិចដល់ទំនាក់ទំនងហ្វីលីពីន-ចិនជារួមនោះទេ។ រដ្ឋាភិបាលហ្វីលីពីនបាននិយាយថា ប្រទេសទាំងពីរ បានអះអាងឡើងវិញនូវការគាំទ្ររបស់ខ្លួនចំពោះក្រមប្រតិបត្តិនៅសមុទ្រចិនខាងត្បូងដើម្បីជួយដោះស្រាយ និងបន្ធូរភាពតានតឹងក្នុងតំបន់។
 

ប៉ុន្តែក្រមប្រតិបត្តិនៅសមុទ្រចិនខាងត្បូងនេះ នៅមិនទាន់បានឯកភាពគ្នានៅឡើយជាង ២០ ឆ្នាំមកនេះបន្ទាប់អាស៊ាននិងចិនបានព្រមព្រៀងគ្នាលើការបង្កើតក្រមនេះដំបូង។ 

កិច្ចពិភាក្សាទ្វេភាគីរវាងលោក Marcos និងលោក ស៊ី  និងការចូលរួមរបស់ចិននៅឯកិច្ចប្រជុំថ្នាក់តំបន់បានកើតស្របពេលដែលមានការប្រកួតប្រជែងកាន់តែខ្លាំងឡើងរវាងចិន និងអាម៉េរិកក្នុងតំបន់។ ក្នុងកិច្ចប្រជុំកំពូល APEC កន្លងទៅ លោក ស៊ី ក្នុងសេចក្តីថ្លែងការណ៍មួយបានព្រមានចំៗថា តំបន់អាស៊ីប៉ាស៊ីហ្វិកអាចធ្លាក់ក្នុងការប្រកួតប្រជែងរវាងប្រទេសមហាអំណាច៕