ជាតិ
កម្ពុជាទទួលបានទេសចរអន្តរជាតិជិត ១,២ លាននាក់ ក្នុងរយៈពេល៩ខែ ឆ្នាំ២០២២ ភ្ញៀវទេសចរមកកម្សាន្តនៅរមណីយដ្ឋានអង្គរ
× ភ្នំពេញ៖ ក្នុងរយៈពេល ៣ត្រីមាស ឆ្នាំ២០២២ កម្ពុជាទទួលបានភ្ញៀវទេសចរអន្តរជាតិជិត ១,២លាននាក់ កើនឡើង ៨៦១ភាគរយ បើធៀបនឹងរយៈពេលដូចគ្នាឆ្នាំ២០២១។ លោក ថោង ខុន រដ្ឋមន្រ្តីក្រសួងទេសចរណ៍ ថ្លែងបែបនេះ នៅក្នុងពិធីសម្ពោធបើកការតាំងពិព័រណ៍វិស័យផ្គត់ផ្គង់ម្ហូបអាហារ សណ្ឋាគារ និងសំណង់ ខ្នាតអន្តរជាតិ ឆ្នាំ២០២២។
ចរន្តភ្ញៀវទេសចរអន្តរជាតិ មានសន្ទុះឡើងវិញ បន្ទាប់ពីការឆ្លងរាលដាលជំងឺកូវីដ-១៩ ធូរស្បើយ។ ការណ៍នេះ បានធ្វើឱ្យចំនួនភ្ញៀវទេសចរអន្តរជាតិមកកម្សាន្តនៅកម្ពុជាមានការកើនឡើង។ របាយការណ៍របស់លោក ថោង ខុន រដ្ឋមន្រ្តីទេសចរណ៍ បញ្ជាក់ថា ក្នុងរយៈពេល ៣ត្រីមាស ឆ្នាំ២០២២ កម្ពុជាទទួលបានភ្ញៀវទេសចរអន្តរជាតិជិត ១,២លាននាក់ កើនឡើង ៨៦១ភាគរយ ធៀបនឹងរយៈពេលដូចគ្នាឆ្នាំ២០២១។ ដោយឡែក ទេសចរផ្ទៃក្នុងធ្វើដំណើរកម្សាន្តក្នុងប្រទេស មានជាង ៩,៦លាននាក់ កើន ៤៣០ភាគ ធៀបនឹងរយៈពេលដូចគ្នាឆ្នាំ២០២១។
លោក ថោង ខុន រដ្ឋមន្រ្តីក្រសួងទេសចរណ៍ ថ្លែងក្នុងពិធីសម្ពោធបើកការតាំងពិព័រណ៍វិស័យផ្គត់ផ្គង់ម្ហូបអាហារ សណ្ឋាគារ និងសំណង់ ខ្នាតអន្តរជាតិ ឆ្នាំ២០២២។ រូបភាពពី Cambodia Hotel Association.
ជាមួយគ្នានេះ ក្រសួងទេសចរណ៍ ក៏ប៉ាន់ស្មានថា កម្ពុជា នឹងអាចទទួលបានភ្ញៀវទេសចរអន្តរជាតិប្រមាណ ២លាននាក់ និងភ្ញៀវទេសចរផ្ទៃក្នុងប្រមាណ ១១លាននាក់ ក្នុងរយៈពេលពេញមួយឆ្នាំ២០២២នេះ។ បើតាមលោក ថោង ខុន ក្នុងរយៈពេល៥ឆ្នាំខាងមុខ (២០២៣-២០២៨) ក្រសួងទេសចរណ៍បានដាក់ចេញនូវគោលនយោបាយ ផែនការ និងយុទ្ធសាស្រ្តធំៗ ក្នុងការគ្រប់គ្រង និងអភិវឌ្ឍន៍វិស័យទេសចរណ៍ប្រកបដោយប្រសិទ្ធភាព គុណភាព និងនិរន្តរភាព។
របាយការណ៍ដដែល បន្តថា កម្ពុជានឹងទាក់ទាញទេសចរអន្តរជាតិឱ្យបានប្រមាណ ៧,៥លាននាក់ និងទេសចរផ្ទៃក្នុងប្រមាណ ១៦លាននាក់ នៅឆ្នាំ២០២៨ខាងមុខ។ សូមបញ្ជាក់ថា ក្នុងឆ្នាំ២០២២នេះ អាជីវកម្មទេសចរណ៍ប្រមាណ ២,៧០៨ទីតាំង បានបើកទ្វារឡើងវិញ និងមានបុគ្គលិកធ្លាប់រងផលប៉ះពាល់ចំនួន ៣១,១០៥នាក់ ទទួលបានការងារវិញ៕
Tag:
ទេសចរណ៍
ភ្ញៀវ
អន្តរជាតិ
© រក្សាសិទ្ធិដោយ thmeythmey.com