បាក់ឌុប៖ មន្រ្តីACU និងគរុសិស្សជិត ៥ពាន់នាក់ នឹងចុះសង្កេតការណ៍នៅឆ្នាំនេះ

ជាតិ

បាក់ឌុប៖ មន្រ្តីACU និងគរុសិស្សជិត ៥ពាន់នាក់ នឹងចុះសង្កេតការណ៍នៅឆ្នាំនេះ

21, Nov 2022 , 10:59 pm

រូបភាព

ជំនួយការអប្បមាទ កំពុងត្រួតពិនិត្យបេក្ខជនដែលចូលប្រឡង។

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ សម័យប្រឡង ៥ ធ្នូ ២០២២នេះ នឹងមានគរុសិស្សដែលជាជំនួយការអប្បមាទចំនួន ២៧០០នាក់ រួមទាំងមន្រ្តីអង្គភាពប្រឆាំងអំពើពុករលួយប្រមាណ ២ពាន់នាក់ ចូលរួមសង្កេតការណ៍ក្នុងដំណើរការប្រឡង។ លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ថ្លែងបែបនេះ នៅក្នុងសន្និសីទសារព័ត៌មានស្ដីពីការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២១ វិច្ឆិកានេះ។

ឆ្នាំនេះ ជាឆ្នាំទី៨ហើយ ដែលក្រសួងអប់រំ យុវជន និងកីឡា បានកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិ ដោយបន្តកិច្ចសហការជាមួយអង្គភាពប្រឆាំងអំពើពុករលួយ ដើម្បីធានាឱ្យដំណើរការប្រឡងប្រព្រឹត្តទៅដោយរលូន មិនមានអំពើពុករលួយ ឬការបើកចម្លងផ្សេងៗ។

«ដើម្បីជួយត្រួតពិនិត្យមើលដំណើរការសំណេរ យើងនឹងប្រើប្រាស់ជំនួយការអប្បមាទ ដែលជាគរុសិស្សចំនួន ២៧០០នាក់។ ម៉្យាងវិញទៀត ក៏មានការសហការជាមួយអង្គភាពប្រឆាំងអំពើពុករលួយ ដែលចូលរួមនៅគ្រប់ដំណាក់កាលទាំងអស់នៃការប្រឡង ដំណាក់កាលសំណេរ, កំណែ, បូកស្រង់ពិន្ទុ និងការប្រកាសលទ្ធផល ដែលមានអ្នកចូលរួមប្រមាណជិត ២ពាន់នាក់»។ នេះជាការលើកឡើងរបស់លោក ហង់ជួន ណារ៉ុន រដ្ឋមន្រ្តីក្រសួងអប់រំ។

លោក ហង់ជួន ណារ៉ុន រដ្ឋមន្រ្តីក្រសួងអប់រំ

រដ្ឋមន្រ្តីក្រសួងអប់រំ បន្តថា បុគ្គលិកអប់រំដែលបានប្រព្រឹត្តសកម្មភាពមិនត្រឹមត្រូវក្នុងការប្រឡង នឹងត្រូវទទួលទណ្ឌកម្មខាងវិន័យមានពីរកម្រិត ក្នុងនោះវិន័យថ្នាក់ទី១ ជាវិស័យស្រាល និងវិន័យថ្នាក់ទី២ ជាវិន័យតឹង។ បើតាមលោក ហង់ជួន ណារ៉ុន សកម្មភាពមិនត្រឹមត្រូវរបស់បុគ្គលិកអប់រំ ក្នុងដំណើរការប្រឡងដែលនឹងទទួលវិន័យថ្នាក់ទី១ មានដូចជា បង្កើតបណ្ដាញស្វែងរកផលកម្រៃពីការប្រឡង, ផ្ដល់ ឬទទួលប្រាក់ដើម្បីរៀបចំបែងចែកតួនាទីក្នុងគណៈកម្មការនានា, ជួយលាក់កំបាំងទង្វើខុសឆ្គងរបស់គណៈមេប្រយោគ ឬគណៈកម្មការប្រឡង, អនុញ្ញាតឱ្យបេក្ខជនចម្លងកិច្ចការគ្នា ឬការពារបេក្ខជនឱ្យចម្លងសំណៅឯកសារ, មិនកែតាមអត្រាកំណែដែលបានសម្រេច និងរំខានអ្នកដទៃក្នុងដំណើរការកំណែ។

បុគ្គលិកអប់រំដែលប្រព្រឹត្តខុស នឹងត្រូវទទួលវិន័យថ្នាក់ទី១ ដោយត្រូវបានស្ដីបន្ទោសដោយផ្ទាល់មាត់ ឬតាមរយៈលិខិតស្នាម និងមិនអាចឡើងតំណែងផងដែរ។ ចំពោះវិន័យថ្នាក់ទី២ បុគ្គលិកអប់រំ នឹងមិនត្រូវបានដាក់បញ្ចូលក្នុងតារាងដែលត្រូវដំឡើងប្រាក់បៀវត្ស និងដាក់ឱ្យទំនេរ ដោយមិនទទួលប្រាក់បៀវត្សជាដើម។

ជំនួយការអប្បមាទ កំពុងត្រួតពិនិត្យបេក្ខជនដែលចូលប្រឡង។

ដោយឡែក បេក្ខជនប្រឡងវិញ ក៏មានកម្រិតវិន័យ៣កម្រិតផងដែរ។ បេក្ខជនប្រឡងដែលឱ្យគេប្រឡងជំនួស នឹងត្រូវធ្លាក់ដោយស្វ័យប្រវត្តិ និងមិនអនុញ្ញាតឱ្យចូលប្រឡងរយៈពេល២ឆ្នាំ។ សម្រាប់បេក្ខជនលួចចម្លងឯកសារ ឬចម្លងគ្នា ក៏នឹងត្រូវធ្លាក់ដោយស្វ័យប្រវត្តិផងដែរ។

ក្នុងរយៈពេល៥ឆ្នាំចុងក្រោយនេះ លោក ហង់ជួន ណារ៉ុន មើលឃើញថាមិនមានបេក្ខជនណា រំលោភលើបទប្បញត្តិ និងមិនមានលួចចម្លងគ្នានោះទេ។ លោក សំណូមពរដល់បេក្ខជនខិតខំប្រឹងប្រែង និងគោរពបទប្បញត្តិឱ្យបានខ្ជាប់ខ្ជួន។

អត្ថបទទាក់ទង

រដ្ឋមន្រ្តីអប់រំ៖ វិញ្ញាសាបាក់ឌុបមិនតឹងពេក មិនធូរពេក តែល្មមសម្រាប់សិស្ស

បាក់ឌុប៖ រដ្ឋមន្រ្តីអប់រំ អំពាវនាវដល់សណ្ឋាគារ និងភោជនីយដ្ឋាន ជួយសម្រួលដល់បេក្ខជនប្រឡង

ក្រសួងអប់រំ មិនតម្រូវឱ្យបេក្ខជនធ្វើតេស្តរកកូវីដ-១៩ មុនពេលប្រឡងឡើយ

បាក់ឌុប៖ មណ្ឌលប្រឡង ២២១មណ្ឌលនៅទូទាំងប្រទេស នឹងបើកទ្វារទទួលបេក្ខជននៅថ្ងៃទី៥ ធ្នូ

សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៥ ធ្នូ ២០២២នេះ មានបេក្ខជនប្រឡងចំនួន ១២៨ ១៣៤នាក់ និងមានមណ្ឌលប្រឡង ២២១ ស្មើនឹង៥១៧៤បន្ទប់។ សម្រាប់ថ្ងៃប្រកាសលទ្ធផល ក្រសួងអប់រំ កំណត់យកថ្ងៃទី ២៧ ធ្នូសម្រាប់រាជធានីភ្នំពេញ និងខេត្តកណ្ដាល និងថ្ងៃទី២៨ ធ្នូ សម្រាប់ខេត្តផ្សេងៗ៕