កីឡាជាតិ
ជាតិ
លីក២០១៤៖ ត្រាយអាស៊ី ឈរកំពូលតារាងបណ្ដោះអាសន្នទាំងក្លិប ទាំងកីឡាករ កីឡាករខ្មែរបារាំង គួច ដានី កំពុងនាំមុខគេលើការស៊ុតបាល់បញ្ចូលទី។ រូបថត CAM Photo Agency
× ឆ្លងកាត់ការប្រកួតក្នុងសប្ដាហ៍ទី៣នៃក្របខណ្ឌមិត្តហ្វូនខេមបូឌានលីក២០១៤ ក្រុមត្រាយអេស៊ីភ្នំពេញ បានឡើងទៅឈរលើកំពូលតារាងជាបណ្តោះអាសន្ន ដោយមាន៧ពិន្ទុស្មើណាហ្គាខប ភ្នំពេញក្រោន និងអគ្គស្នងការដ្ឋាននគរបាលជាតិ។ ស្របពេលជាមួយគ្នានេះ ខ្សែបម្រើខ្មែរបារាំង គួច ដានី នៃក្លិបត្រាយអេស៊ី បានឈានមុខគេលើការស៊ុតបាល់បញ្ចូលទីផងដែរ តាមរយៈការសម្រេចបាន៤គ្រាប់។
កាលពីល្ងាចថ្ងៃសៅរ៍ ត្រាយអាស៊ី បានដណ្ដើមកៅអីលេខ១ បណ្ដោះអាសន្នពីក្រុមភ្នំពេញក្រោនក្រោយយកឈ្នះក្រុម Albirex Niigata ក្នុងលទ្ធផល ៨ ទល់ ១ ខណៈដែល គួច ដានី រកបានបីគ្រាប់តែម្នាក់ឯង។
តាម Page Facebook របស់ក្លិបលោក Daisuke Yoshioka គ្រូបង្វឹកបង្គោល និង ជាអ្នកចាត់ការក្រុម ត្រាយអាស៊ី នៅតែមិនអស់ចិត្តចំពោះការរបូតគ្រាប់បាល់មួយគ្រាប់ ហើយលោកនៅតែគិតថានេះជាបញ្ហាក្នុងក្រុមដែលត្រូវដោះស្រាយឱ្យបានច្បាស់លាស់ពីកីឡាករម្នាក់ទៅកីឡាករម្នាក់មុនការប្រកួតលើកក្រោយមកដល់។
ក្លិបដែលមានថ្នាក់ដឹកនាំជាជនជាតិជប៉ុនមួយនេះនៅមិនទាន់ស្គាល់ពាក្យថាចាញ់នៅឡើយ ក្នុងប្រកួតផ្លូវការគិតត្រឹម ១៧ ប្រកួតកន្លងមក បើគិតទាំងជម្រុះក្នុងក្របខណ្ឌ ក១, ជម្រុះពានរង្វាន់ Hun Sen Cup តាមតំបន់នីមួយៗ និង ជុំផា្ដច់ព្រ័ត្រ រួមទាំងលីករដូវកាល ២០១៤ នេះផងដែរ។
បើទោះជាលេខ ១ បណ្ដោះអាសន្នមែន ប៉ុន្ដែត្រាយអាស៊ី មាន៧ ពិន្ទុស្មើក្រុមលេខ ២ ណាហ្គាខប ក្រុមលេខ ៣ ភ្នំពេញក្រោន និង ក្រុមលេខ ៤ អគ្គស្នងការដ្ឋាននគរបាលជាតិ តែទាស់គ្រាប់បាល់ទាត់បញ្ជូលទីប៉ុណ្ណោះ។
ចំណែកក្រុមអាស៊ីអឺរ៉ុប និង Albirex Niigata កំពុងតែចាប់ផ្ដើមមិនបានល្អនៅដើមរដូវកាលព្រោះនៅបាតតារាត ឈរនៅតំបន់ដែលត្រូវជម្រុះចេញទៅលេងវគ្គ Play Off។
សម្រាប់តារាងចំណាត់ថ្នាក់កីឡាករដែលស៊ុតបាល់បញ្ចូលទីច្រើនជាងគេរួមមាន គួច ដានី រកបាន៤គ្រាប់ ខណៈ សុខ ច័ន្ទរស្មី ដែលជាមិត្តរួមក្រុមត្រាយអេស៊ីរកបាន៣គ្រាប់ស្មើ ចាន់ វឌ្ឍនាកា (បឹងកេត) ស៊ុន សុវណ្ណរិទ្ធី (ណាហ្គាខប) និង Kazuki Tatsuta (Albirex)៕
© រក្សាសិទ្ធិដោយ thmeythmey.com