លោក ពុយ គា ត្រូវបានគណៈកម្មាធិការនាយកក្លិបអ្នកកាសែតកម្ពុជា (ក.អ.ក) សម្រេចជ្រើសតាំងជាប្រធានក្លិប ហើយតំណែងអគ្គលេខាធិការរបស់លោក ត្រូវជំនួសដោយលោក ខៀវ កូឡា។ នេះបើតាមសេចក្តីជូនដំណឹងរបស់ ក.អ.ក នាថ្ងៃទី៥ ខែធ្នូ ឆ្នាំ២០២២។

 

សមាសភាពថ្នាក់ដឹកនាំក្លិបអ្នកកាសែតកម្ពុជា ត្រូវបានផ្លាស់ប្តូរ បន្ទាប់ពីលោក ប៉ែន បូណា ដែលកាន់តំណែងជាប្រធានតាំងពីខែមេសា ឆ្នាំ២០១៥ បានសុំលាឈប់ ក្រោយលោកទទួលបានការតែងតាំងជារដ្ឋលេខាធិការក្រសួងព័ត៌មាន។

 

ការជ្រើសតាំងលោក ពុយ គា ជាប្រធានក្លិប និងលោក ខៀវ កូឡា ជាអគ្គលេខាធិការធិការ ជាការអនុវត្តតាមលក្ខន្តិកៈ និងបទបញ្ជាផ្ទៃក្នុងរបស់ក្លិប ដើម្បីបន្តនិរន្តរភាពការងារ។ កន្លងមក លោក ពុយ គា ជាអគ្គលេខាធិការ រីឯលោក ខៀវ កូឡា ជាសមាជិកគណៈកម្មការនាយក។

 

បើតាម ក.អ.ក សមាជដើម្បីបោះឆ្នោតជ្រើសរើសប្រធាន និងអគ្គលេខាធិការឱ្យស្របតាមលក្ខន្តិកៈ នឹងប្រព្រឹត្តទៅតាមពេលវេលាសមស្របនាពេលខាងមុខ៕