អន្តរជាតិ
ចិន៖ របាយការណ៍អាម៉េរិកលើអំណាចយោធាចិន ជាការស្មានដោយគ្មានមូលដ្ឋានត្រឹមត្រូវ លោក Tan Kefei អ្នកនាំពាក្យក្រសួងការពារជាតិចិន។ រូបភាពយកពីក្រសួងការពារជាតិចិន.
× អ្នកនាំពាក្យក្រសួងការពារជាតិចិន លោក Tan Kefei នៅថ្ងៃទី៦ ខែធ្នូ បានច្រានចោលរបាយការណ៍របស់មន្ទីរបញ្ចកោណអាម៉េរិកស្តីពី «អំណាចយោធាចិនឆ្នាំ២០២២» ដោយអះអាងថា របាយការណ៍នោះ ជាការស្មានដោយគ្មានមូលដ្ឋានត្រឹមត្រូវ។ បើតាមអ្នកនាំពាក្យរូបនេះ ចិនជ្រើសយកការអភិវឌ្ឍប្រកបដោយសន្តិភាព និងប្រកាន់គោលនយោបាយការពារជាតិ។
នៅក្នុងរបាយការណ៍ស្តីពី «អំណាចយោធាចិនឆ្នាំ២០២២» ចេញកាលពីខែមុន មន្ទីរបញ្ចកោណអាម៉េរិក បានវាយតម្លៃថា ចិនអាចទំនងជាមានស្តុកក្បាលគ្រាប់នុយក្លេអ៊ែរប្រមាណ ១៥០០ គ្រាប់នៅត្រឹមឆ្នាំ ២០៣៥ ខាងមុខ ប្រសិនបើចិនបន្តជាមួយនឹងល្បឿននៃការបង្កើតអាវុធនុយក្លេអ៊ែរដូចពេលបច្ចុប្បន្ន។
តួលេខនេះបានគូសបញ្ជាក់ពីការព្រួយបារម្ភរបស់អាម៉េរិកនៃការកើនឡើងចេតនារបស់ចិនក្នុងការពង្រីកឃ្លាំងអាវុធនុយក្លេអ៊ែររបស់ខ្លួន បើទោះបីជាការព្យាករណ៍មិនបានបង្ហាញថាចិនបានបង្កើនល្បឿននៃការអភិវឌ្ឍលឿនជាងមុនក្តី។
ឆ្លើយតបនឹងរបាយការណ៍នេះ ក្រសួងការពារជាតិចិនបានលើកឡើងថា អាម៉េរិកកំពុងស្មានដោយគ្មានមូលដ្ឋានត្រឹមត្រូវពីទំនើបកម្មនៃកងកម្លាំងនុយក្លេអ៊ែររបស់ចិន។ ក្រសួងក៏បានបន្ថែមថា អាម៉េរិកគួរតែពិនិត្យមើលលើគោលនយោបាយនុយក្លេអ៊ែររបស់ខ្លួនជាមុន ព្រោះអាម៉េរិកបច្ចុប្បន្នមានឃ្លាំងអាវុធនុយក្លេអ៊ែរធំបំផុតរបស់ពិភពលោក។
ក្រសួងការពារជាតិចិនបានបន្ថែមថា អាម៉េរិកកំពុងអភិវឌ្ឍយ៉ាងខ្លាំងក្លា ដើម្បីដាក់ពង្រាយអាវុធនុយក្លេអ៊ែរយុទ្ធសាស្ត្រជួរមុខ និងកំពុងធ្វើការរីកសាយអាវុធនុយក្លេអ៊ែររបស់ខ្លួនតាមរយៈភាពជាដៃគូសន្តិសុខជាមួយអង់គ្លេស និងអូស្ត្រាលី។
«យើងចង់សង្កត់ធ្ងន់ថា ចិនបន្តអនុវត្តយុទ្ធសាស្ត្រនុយក្លេអ៊ែរដើម្បីការពារខ្លួនម៉ឺងម៉ាត់ ប្រកាន់ខ្ជាប់នូវគោលនយោបាយមិនប្រើប្រាស់អាវុធនុយក្លេអ៊ែរដំបូងគេគ្រប់ពេលវេលា ឬក្នុងកាលៈទេសៈណាក៏ដោយហើយរក្សាកម្លាំងនុយក្លេអ៊ែររបស់ខ្លួននៅកម្រិតទាបបំផុតដើម្បីតែការពារសន្តិសុខជាតិប៉ុណ្ណោះ»។ នេះបើតាមសេចក្តីថ្លែងការណ៍មួយរបស់ក្រសួងការពារជាតិចិន។
លើសពីនេះ ក្រសួងការពារចិនក៏បានសង្កត់ថា អាម៉េរិកកន្លងមក ជាប្រទេសបង្កើតបញ្ហាធំបំផុតដែលប៉ះពាល់ដល់សន្តិសុខពិភពលោក។ អាម៉េរិកតែងបង្កើតបញ្ហាដើម្បីផលប្រយោជន៍ផ្ទាល់ខ្លួន បង្កើតការបែកបាក់ និងការប្រឈមមុខដាក់គ្នានៅក្នុងពិភពលោក ហើយនាំមកនូវភាពចលាចល និងគ្រោះមហន្តរាយគ្រប់ទីកន្លែងដែលអាម៉េរិកលូកដៃ។
យោងតាមវិទ្យាស្ថានស្រាវជ្រាវសន្តិភាពអន្តរជាតិស្តុកខុល (SIPRI) បច្ចុប្បន្ន អាម៉េរិកមានគ្រាប់នុយក្លេអ៊ែរសរុប ៥៤២៨ នៅក្នុងឆ្នាំ២០២២ ដោយក្បាលគ្រាប់ចំនួន ១៧៤៤ ត្រូវបានបំពាក់រួច៕
© រក្សាសិទ្ធិដោយ thmeythmey.com