ក្នុងវិចារណកថាទាក់ទិននឹងចិន ដែលចុះផ្សាយលើទស្សនាវដ្តី Foreign Affairs អធិការបតីអាល្លឺម៉ង់ លោក Olaf Scholz បានយល់ឃើញថា ការកើនឡើងឥទ្ធិពលរបស់ចិនមិនអាចធានាភាពឯកោរបស់ចិន ឬការបង្ការកិច្ចសហប្រតិបត្តិការឡើយ។ មិនតែប៉ុណ្ណោះ មេដឹកនាំអាល្លឺម៉ង់រូបនេះ មិនឯកភាពឡើយ ចំពោះគំនិត ដែលអះអាងថា ពិភពលោក កំពុងស្ថិតនៅលើមាត់ជ្រោះនៃសង្រ្គាមត្រជាក់ថ្មី ដែលជំរុញឱ្យអាម៉េរិកប្រឆាំងនឹងចិន។​

 

ទាក់ទិននឹងវិចារណកថាខាងលើ អ្នកនាំពាក្យក្រសួងការបរទេសចិន លោកស្រី Mao Ning បានថ្លែងការពារថា ចិនតែងគោរពគោលបំណងនៃគោលនយោបាយការបរទេសរបស់ខ្លួន ដើម្បីការពារសន្តិភាពពិភពលោក និងលើកតម្កើងការអភិវឌ្ឍរួម រួមទាំងអភិវឌ្ឍកិច្ចសហប្រតិបត្តិការជាមួយប្រទេសផ្សេងទៀត។ 

 

ត្រង់ចំណុចនេះ អ្នកនាំពាក្យក្រសួងការបរទេសចិន បានបកស្រាយថា ការរឹតត្បិត និងធ្វើឱ្យចិនស្ថិតក្នុងភាពឯកោ មិនមែនជាផលប្រយោជន៍របស់ភាគីណាមួយឡើយ។ ត្រង់ចំណុចនេះ លោកស្រី Mao បានបន្ថែមថា និន្នាការនៃសកលភាវូបនីយកម្មសេដ្ឋកិច្ចបច្ចុប្បន្ន ជាការទទួលផលប្រយោជន៍ទៅវិញទៅមក និងស្ថានភាពឈ្នះៗ ហើយសេដ្ឋកិច្ចចិន បានចូលរួមយ៉ាងខ្លាំងជាមួយពិភពលោក។

 

បើតាមមន្រ្តីក្រសួងការបរទេសចិន ការអភិវឌ្ឍរបស់ចិន មិនអាចសម្រេចបាន ដោយគ្មានពិភពលោកបានឡើយ ហើយពិភពលោក ក៏ត្រូវការចិនផងដែរ។ ជុំវិញបញ្ហានេះ លោកស្រី Mao បានប្តេជ្ញាថា ចិននឹងបន្តការបើកចំហរ និងធ្វើការជាមួយប្រទេសទាំងអស់ ដើម្បីចែករំលែកលើឱកាសក្នុងការអភិវឌ្ឍ៕