ជាតិ
លោក ឌិត ទីណា ចង់ឱ្យសាកលវិទ្យាល័យភូមិន្ទកសិកម្ម ក្លាយជាសាកលវិទ្យាល័យនាំមុខ ក្នុងប្រទេស និងតំបន់ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ រូបភាពពីហ្វេសប៊ុកលោក ឌិត ទីណា
× ភ្នំពេញ៖ នៅថ្ងៃអនាគត លោក ឌិត ទីណា រដ្ឋមន្រ្តីក្រសួងកសិកម្ម មានបំណងជំរុញឱ្យសាកលវិទ្យាល័យភូមិន្ទកសិកម្មក្លាយជាសាកលវិទ្យាល័យនាំមុខមួយ នៅក្នុងប្រទេស និងតំបន់។ ការលើកឡើងបែបនេះ បន្ទាប់ពីលោក ជួបពិភាក្សាពីយុទ្ធសាស្រ្ត និងផែនការអភិវឌ្ឍន៍របស់សាកលវិទ្យាល័យភូមិន្ទកសិកម្ម កាលពីថ្ងៃទី៧ ធ្នូ។
លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លើកឡើងថា កសិកម្ម គឺជាវិស័យដែលមានវិសាលភាពទូលំទូលាយ ហើយការបណ្ដុះបណ្ដាលធនធានមនុស្សគឺជារឿងដ៏សំខាន់ និងចាំបាច់ ដើម្បីអភិវឌ្ឍវិស័យនេះឱ្យដើរទៅមុខ។
ជំនួបជាមួយថ្នាក់ដឹកនាំសាកលវិទ្យាល័យភូមិន្ទកសិកម្ម។ រូបភាពពីហ្វេសប៊ុកលោក ឌិត ទីណា
«ជាចក្ខុវិស័យនាពេលអនាគត ខ្ញុំចង់ជំរុញឱ្យសាកលវិទ្យាល័យភូមិន្ទកសិកម្មក្លាយជាសាកលវិទ្យាល័យនាំមុខមួយ នៅក្នុងប្រទេស និងនៅក្នុងតំបន់»។ នេះជាការលើកឡើងរបស់លោក ឌិត ទីណា ដោយបន្តថា ដើម្បីសម្រេចគោលដៅនេះ ត្រូវមានការអនុវត្តទ្រឹស្តីផ្សារភ្ជាប់នឹងការងារក្នុងមជ្ឈដ្ឋានវិជ្ជាជីវៈផ្ទាល់។
រដ្ឋមន្រ្តីកសិកម្មរូបនេះ មានជំនឿថាប៉ុន្មានឆ្នាំទៅមុខ និស្សិតដែលចេញពីសាកលវិទ្យាល័យនេះ នឹងក្លាយជាធនធានមនុស្សដ៏ពេញនិយមសម្រាប់ក្រុមហ៊ុនទាំងឡាយ។ ក្នុងជំនួបជាមួយថ្នាក់ដឹកនាំសាកលវិទ្យាល័យភូមិន្ទកសិកម្ម លោក ឌិត ទីណា បង្ហាញក្ដីសង្ឃឹមដូច្នេះ៖ «ខ្ញុំសង្ឃឹមថា ទាំងនេះនឹងទាក់ទាញសិស្សពូកែទាំងឡាយឱ្យចង់ចូលរៀននៅសាលកវិទ្យាល័យភូមិន្ទកសិកម្ម ដោយក្នុងនោះ យើងបើកទ្វារស្វាគមន៍ផងដែរ ទៅដល់សិស្សដែលមានពិការភាព»។
សូមបញ្ជាក់ថា សាកលវិទ្យាល័យភូមិន្ទកសិកម្ម ត្រូវបានបង្កើតនៅឆ្នាំ១៩៦៤។ នាពេលកន្លងទៅ និស្សិតកសិកម្មនៃសាកលវិទ្យាល័យភូមិន្ទកសិកម្ម បានចុះកម្មសិក្សានៅប្រទេសអ៊ីស្រាអែល តាមរយៈកិច្ចសហប្រតិបត្តិការជាមួយក្រុមហ៊ុន Agrostudies Agriculture Capacity Buildingផងដែរ។ និស្សិតកម្ពុជា ដែលបានទៅសិក្សានៅអ៊ីស្រាអែល ភាគច្រើនត្រូវបានបណ្ដុះបណ្ដាលចំណេះដឹងបច្ចេកទេសកសិកម្មទាំងទ្រឹស្ដី និងការអនុវត្ត៕
Tag:
កសិកម្ម
អប់រំ
ឌិត ទីណា
© រក្សាសិទ្ធិដោយ thmeythmey.com