សម្ដេច ហ៊ុន សែន ស្នើឱ្យក្រសួងទេសចរណ៍ និងរដ្ឋបាលខេត្តព្រះសីហនុ ពិនិត្យលទ្ធភាពរៀបចំ«សារមន្ទីរឆ្នេរ»

ជាតិ

សម្ដេច ហ៊ុន សែន ស្នើឱ្យក្រសួងទេសចរណ៍ និងរដ្ឋបាលខេត្តព្រះសីហនុ ពិនិត្យលទ្ធភាពរៀបចំ«សារមន្ទីរឆ្នេរ»

10, Dec 2022 , 11:29 am

រូបភាព

សម្ដេច ហ៊ុន សែន នាយករដ្ឋមន្រ្តីកម្ពុជា អញ្ជើញចូលរួមនៅក្នុងពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។ រូបភាពពី SPM

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ សម្ដេច ហ៊ុន សែន នាយករដ្ឋមន្រ្តីកម្ពុជា បានស្នើឱ្យក្រសួងទេសចរណ៍ និងអាជ្ញាធរខេត្តព្រះសីហនុ ពិនិត្យលទ្ធភាព ដើម្បីរៀបចំ«សារមន្ទីរឆ្នេរ»។ សម្ដេច លើកឡើងបែបនេះ នៅក្នុងពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ។

នៅព្រឹកថ្ងៃទី១០ ធ្នូនេះ សម្ដេច ហ៊ុន សែន នាយករដ្ឋមន្រ្តីកម្ពុជា បានអញ្ជើញចូលរួមនៅក្នុងពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។ ក្នុងពិធីបើកមហាសន្និបាតលើកទី១៦នេះ សម្ដេច ហ៊ុន សែន បានថ្លែងអំណរគុណដល់ក្រុមប្រឹក្សាភិបាល និងសមាជិកក្លឹបទាំងអស់ ដែលបានគាំទ្រឆ្នេរសមុទ្រកម្ពុជា និងយល់ព្រមដាក់បញ្ចូលឆ្នេរសមុទ្រកម្ពុជាទាំងមូលជាសមាជិក។

គណៈអធិបតីក្នុងពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។ រូបភាពពី SPM

សម្ដេចនាយករដ្ឋមន្រ្តី បន្តថា ការចូលជាសមាជិកក្លឹបនេះ បានធ្វើឱ្យមានការប្រែប្រួលមុខមាត់របស់តំបន់សមុទ្រកម្ពុជា ទាំងលើទិដ្ឋភាពសង្គម-សេដ្ឋកិច្ច, ទេសចរណ៍, នគរូបនីយកម្ម និងបរិស្ថាន។ បើតាមសម្ដេច កិច្ចការនេះ បានធ្វើឱ្យតំបន់ឆ្នេរកម្ពុជាអាចដើរតួនាទីយ៉ាងសំខាន់ ក្នុងការទាក់ទាញវិនិយោគសម្រាប់ជំរុញកំណើនសេដ្ឋកិច្ចជាតិ និងត្រូវបានចាត់ទុកជាគោលដៅទេសចរណ៍ធម្មជាតិដ៏ទាក់ទាញផងដែរ។

ក្នុងឱកាសនោះ សម្ដេច ហ៊ុន សែន ក៏បានស្នើឱ្យក្រសួងទេសចរណ៍ និងអាជ្ញាធរខេត្តព្រះសីហនុ ពិនិត្យលទ្ធភាពរៀបចំ«សារមន្ទីរឆ្នេរ» (Maison de le Baie)។ បន្ថែមលើនេះ សម្ដេចក៏បានស្នើឱ្យប្រធានក្លឹប និងសមាជិកក្លឹបទាំងអស់ ជួយចែករំលែកបទពិសោធ និងដំណើរការនៃការរៀបចំសារមន្ទីរឆ្នេរជាដើម។

ជាមួយគ្នានេះ សម្ដេច ហ៊ុន សែន ក៏បានស្នើឱ្យក្រសួងទេសចរណ៍ សហការជាមួយក្លឹបឆ្នេរសមុទ្រដែលស្អាតបំផុតលើសកលលោក សិក្សារៀបចំឱ្យមាននូវ ស្ថាប័នអង្កេតទេសចរណ៍សម្រាប់ឆ្នេរ។ ការបង្កើតស្ថាប័ននេះ ដើម្បីជំរុញការអភិវឌ្ឍវិស័យទេសចរណ៍តំបន់ឆ្នេរសមុទ្រ ដូចដែលសមាជិកផ្សេងទៀត បានរៀបចំ។

សូមបញ្ជាក់ថា ឆ្នេរសមុទ្រកម្ពុជា ត្រូវបានបញ្ចូលជាសមាជិកពេញសិទ្ធិក្លឹបឆ្នេរសមុទ្រដែលស្អាតបំផុតលើសកលលោកក្នុងអង្គមហាសន្និបាតលើកទី៧ កាលពីថ្ងៃទី២៦ ខែឧសភា ឆ្នាំ២០១១ នៅទីក្រុងតូបាកូតា ប្រទេសសេណេហ្កាល់។ ឆ្នេរសមុទ្រកម្ពុជា ត្រូវបានប្រសិទ្ធនាមថា «ឆ្នេរសមុទ្រកម្ពុជា តារារះនាទិសនិរតី»៕