ជាតិ
ក្រសួងអប់រំ ចាប់ផ្ដើមកែសន្លឹកកិច្ចការបេក្ខជននៅថ្ងៃនេះ និងមិនឱ្យគ្រូបង្រៀនយកទូរសព្ទចូលបន្ទប់កំណែឡើយ លោកគ្រូ អ្នកគ្រូ ចាប់ផ្ដើមកែសន្លឹកកិច្ចការបេក្ខជន។ រូបភាពពី ក្រសួងអប់រំ យុវជន និងកីឡា។
× ភ្នំពេញ៖ ក្រសួងអប់រំ យុវជន និងកីឡា បានចាប់ផ្ដើមដំណើរការកំណែសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី១១ ខែធ្នូនេះ នៅតាមមណ្ឌលកំណែចំនួន ១០។ ក្នុងដំណើរការកំណែនេះ ក្រសួងអប់រំ មិនអនុញ្ញាតឱ្យចូលនូវឧបករណ៍អេឡិចត្រូនិក និងទូរសព្ទដៃចូលបន្ទប់កំណែឡើយ។
ក្រោយដំណើរការប្រឡងសញ្ញាបត្រមធ្យមសិក្សាទុតិយភូមិ បានបញ្ចប់កាលពីថ្ងៃទី៦ ធ្នូ ក្រសួងអប់រំ យុវជន និងកីឡា បានចាប់ផ្ដើមដំណើរការកំណែនៅថ្ងៃទី១១ ធ្នូនេះ។ ក្រសួងអប់រំ បានកំណត់យកមណ្ឌលកំណែចំនួន ១០ នៅរាជធានីភ្នំពេញ សម្រាប់កែសន្លឹកវិញ្ញាសារបស់បេក្ខជនទាំង១០មុខវិជ្ជា។
បើតាមក្រសួងអប់រំ ក្នុងដំណើរការកំណែនេះ មិនអនុញ្ញាតឱ្យលោកគ្រូ អ្នកគ្រូ យកភ្ជាប់មកជាមួយនូវទូរសព្ទដៃ និងឧបករណ៍អេឡិចត្រូនិកចូលបន្ទប់កំណែឡើយ។ ជាមួយគ្នានេះ គ្រប់បន្ទប់កំណែទាំងអស់ មានបំពាក់កាម៉េរ៉ាសុវត្ថិភាព និងក្រោមការត្រួតពិនិត្យដោយអង្គភាពប្រឆាំងអំពើពុករលួយ។
បន្ថែមលើនេះ ក្រសួងអប់រំ ក៏បានណែនាំដល់លោកគ្រូ អ្នកគ្រូ ឱ្យបំពេញភារកិច្ចឱ្យបានត្រឹមត្រូវ និងយកចិត្តទុកដាក់ក្រោមស្មារតីទទួលខុសត្រូវខ្ពស់ផងដែរ។ សូមបញ្ជាក់ថា ក្រសួងអប់រំ យុវជន និងកីឡា បានកំណត់យកថ្ងៃទី ២៧ ធ្នូ សម្រាប់ប្រកាសលទ្ធផលនៅរាជធានីភ្នំពេញ និងខេត្តកណ្ដាល។ ដោយឡែក សម្រាប់ខេត្តផ្សេងៗនឹងប្រកាសលទ្ធផលនៅថ្ងៃទី ២៨ ធ្នូ៕
© រក្សាសិទ្ធិដោយ thmeythmey.com