ក្នុង​ដំណើរទស្សនកិច្ច​ទៅ​តំបន់​អឺរ៉ុបនេះ សម្ដេច ប្រមើល​ឃើញ​ថាប្រធានបទ​​ត្រូវ​ពិភាក្សា​ នឹង​ទាក់ទងពី​បញ្ហា​សន្តិភាព​ ដែល​ជា​ប្រធានបទ​ដ៏​ធំ។ ក្រៅ​ពី​មាន​ជំនួបពិភាក្សា​ការងារ​ជាមួយ​ប្រធានាធិបតី​បារាំង សម្ដេច ហ៊ុន សែន ក៏​នឹង​ចូល​រួម​សន្និសីទស្ដី​ពីការគាំទ្រភាពធន់នៃប្រជាជនអ៊ុយក្រែនផងដែរ។ 
 

ពាក់ព័ន្ធ​នឹង​ប្រធានបទខាងលើ សម្ដេច ហ៊ុន សែន នាយករដ្ឋមន្រ្តីកម្ពុជា​ សង្កត់​ធ្ងន់​ថា៖ «ខ្ញុំមិនទៅពីអាស៊ី នាំប្រេងទៅចាក់លើភ្លើង ក្នុងទ្វីបអឺរ៉ុបនោះទេ។ សង្រ្គាម​កំពុងតែ​កើត​នៅក្នុង​តំបន់​អឺរ៉ុប​​ ដែលនៅ​ទី​ធ្លាប់តែមានសន្តិភាព ក៏ប៉ុន្តែ​ឥឡូវនេះ ​​តាមរយៈបញ្ហាដែលកំពុងកើតនៅ​អឺរ៉ុប បាន​ក្លាយជា​ប្រធានបទដ៏​ធំ​»។
 

សូម​បញ្ជាក់ថា ក្នុងកិច្ចប្រជុំកំពូលរំលឹកខួបអាស៊ាន-សហភាពអឺរ៉ុប នឹងមានព្រឹត្តិការណ៍អមជាច្រើនរួមមាន​ កិច្ចប្រជុំកំពូលធុរកិច្ចអាស៊ាន-សហភាពអឺរ៉ុប លើកទី១០, កិច្ចប្រជុំកំពូលយុវជនអាស៊ាន-សហភាពអឺរ៉ុប និងកិច្ចសហប្រតិបត្តិការអបអរសាទរប្រជាជនអាស៊ាន-សហភាពអឺរ៉ុប ស្តីពីឧត្តមសិក្សា។ អំឡុងពេលស្នាក់នៅទីក្រុងព្រុចសែល សម្ដេចនាយករដ្ឋមន្រ្តី នឹងមានកម្មពិធីពិសាអាហារពេលព្រឹកជាមួយ នាយករដ្ឋមន្រ្តីវៀតណាម និងនាយករដ្ឋមន្រ្តីឡាវ។ ក្រៅពីនេះ សម្ដេច នឹងជួបសំណេះសំណាលជាមួយពលរដ្ឋខ្មែរដែលរស់នៅអឺរ៉ុបផងដែរ៕