ចំនួន​ភ្ញៀវទេសចរ​អន្តរជាតិ​ដែលធ្វើដំណើរ​ចូល​មក​កម្ពុជា មាន​ការ​កើន​ឡើង​គួរ​ឱ្យ​កត់​សម្គាល់​។ តួយ៉ាង​ក្នុងរយៈពេល១១ខែ ឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិ ចំនួន ១,៩១៤,០៥៥នាក់ កើនឡើងដល់ ១,០៧១.៦ភាគរយ ធៀបនឹងរយៈពេលដូចគ្នាក្នុងឆ្នាំ២០២១។ ក្នុងចំណោម​ភ្ញៀវទេសចរ​ទាំងនោះ មាន​៦៧៣ ៦៦៩នាក់ ធ្វើ​ដំណើរតាម​ផ្លូវអាកាស, តាម​ផ្លូវ​គោក មាន​ចំនួន ១ ២២៦ ១១៥នាក់ និង​តាម​ផ្លូវទឹក មាន​ចំនួន ១៤ ២៧១នាក់។ 
  

 

លោក ហោ សារុន រដ្ឋលេខាធិការក្រសួងទេសចរណ៍ អះអាងថា កំណើនភ្ញៀវទេសចរ​នេះ ឆ្លុះ​បញ្ចាំង​ពី​ភាពជឿជាក់​ លើ​សន្ដិសុខសុវត្ថិភាព និង​ភាព​ទាក់ទាញ​ក្នុង​វិស័យទេសចរណ៍​។ បើតាម​រដ្ឋលេខាធិការរូបនេះ ចំនួន​ភ្ញៀវទេសចរ​នៃ​ប្រទេសជិត​ខាង​ នៅ​តែ​មាន​ចំនួន​ច្រើន​នាំ​មុខ​គេ។ 
 

របាយការណ៍​របស់​លោក ហោ សារុន បង្ហាញ​ថា ទេសចរថៃ​បាន​ឈរ​នៅ​លំដាប់ទី១ ដែល​មាន​ចំនួន ៧២០ ២០៣នាក់, ទេសចរវៀតណាម ស្ថិត​នៅ​លំដាប់ទី២ មាន​ចំនួន ៤០១ ១៩៣នាក់។ ចំណែក​ភ្ញៀវទេសចរចិនវិញ បាន​ឈរ​លំដាប់លេខ៣ មាន​ចំនួន ៩០ ៦៤៨នាក់។ ក្រៅពីទេសចរសំខាន់​ខាង​លើ កម្ពុជា​ក៏​ទទួលបាន​ទេសចរ​ផ្សេងទៀត ដូចជា ទេសចរអាម៉េរិក, ឡាវ, ឥណ្ឌូណេស៊ី, កូរ៉េ, បារាំង, ម៉ាឡេស៊ី និង​អង់គ្លេស៕