ខ្សែការពារ Lisandro Martinez ដំបូងឡើយបានជួបបញ្ហាក្រោយពេលផ្លាស់ប្តូរទៅកាន់ Man United ពីក្លិប Ajax Amsterdam។ ប៉ុន្តែចាប់តាំងពីខ្សែការពាររូបនេះបានក្លាយជាផ្នែកមួយនៃគម្រោងរបស់លោក Erik ten Hag នៅក្រុមបិសាចក្រហម រូបគេបានបង្ហាញទម្រង់លេងដ៏គួរឱ្យភ្ញាក់ផ្អើលសម្រាប់តំបន់ការពារ។
 

នៅ World Cup ប្រទេសកាតាខ្សែការពារ Martinez បានបង្ហាញវត្តមានចំនួន ៥លើកឱ្យអាហ្សង់ទីន និង ២ប្រកួតចុងក្រោយរូបគេត្រូវបានផ្លាស់ប្តូរចូលក្នុងម៉ោងបន្ថែម ខណៈដែលក្រុមដឹកនាំដោយប្រធានក្រុម Lionel Messi បាននាំក្រុមឈ្នះពាន​ World Cup លើកទី៣ និងជាលើកដំបូងក្នុងអាជីពរបស់ពួកគេ។
 

ថ្លែងទៅកាន់អ្នកគាំទ្របិសាចក្រហម Man United មុនជំនួបក្នុងពានរង្វាន់ EFL Cup វគ្គ ១៦ក្រុមចុងក្រោយទល់ Burnley ខ្សែបម្រើ McTominay បាននិយាយក្នុងសន្និសីទកាសែតទាក់ទងនិងមិត្តរួមក្រុមឈ្នះ World Cup ថាក្រុមបិសាចក្រហមទទួលបានភាពជឿជាក់ជាថ្មី ក្នុងការប្រជែងពានរដូវកាលនេះ ក្រោយខកខាន៥រដូវកាលចុងក្រោយ។
 

«ភាពជឿជាក់ ជារឿងដ៏សំខាន់បំផុតនៅក្នុងបាល់ទាត់ក៏ដូចជានៅក្លិបបិសាចក្រហម។[…] ខ្ញុំបានផ្ញើសារទៅ Lisandro ដើម្បីអបអររូបគេជាមួយជ័យជម្នះ ដោយនិយាយថា យើងនឹងត្រូវស្វែករកពានរង្វាន់បន្ថែមទៀតនៅក្រុមបិសាចក្រហម។»។ នេះបើតាមសម្តីរបស់ McTominay។
 

គួររំលឹកថាក្រុមបិសាចក្រហមបានប្រកួតយកឈ្នះក្រុម Burnley លទ្ធផល ២-០ នៅក្នុងជំនួបវគ្គ ១៦ក្រុមចុងក្រោយនៃពានរង្វាន់ EFL Cup កាលពីរាត្រីថ្ងៃទី២០ ខែធ្នូ។ ២គ្រាប់រកបានដោយ Christian Eriksen និង Marcus Rashford៕