ជាតិ
ទិដ្ឋភាពនាខេត្តមណ្ឌលគិរី។ រូបភាព៖ ញឹក ស្រីល័ក្ខ
×![]()
ភ្នំពេញ៖ នៅថ្ងៃបុណ្យចូលឆ្នាំសកល ឆ្នាំ២០២៣ខាងមុខ រដ្ឋបាលខេត្តមណ្ឌលគិរី នឹងរៀបចំពិធីអបអរសាទររយៈពេល ៣ថ្ងៃ ចាប់ពីថ្ងៃទី៣១ ធ្នូ នាបរិវេណវិមានឯករាជ្យ។ នេះបើតាមលោក ជាក់ ម៉េងហ៊ាង អភិបាលរងខេត្តមណ្ឌលគិរី ថ្លែងប្រាប់សារព័ត៌មាន Thmey Thmey 25។
ដើម្បីបង្កឱ្យមានភាពសប្បាយរីករាយ និងទាក់ទាញទេសចរណ៍ឱ្យមកកម្សាន្តនៅខេត្តមណ្ឌលគិរីកាន់តែច្រើន រដ្ឋបាលខេត្ត នឹងរៀបចំពិធីអបអរសាទរបុណ្យចូលឆ្នាំសកល ២០២៣។ ពិធីអបអរនេះ នឹងមានកម្មវិធីប្រគំតន្រ្តី, ការតាំងពិព័រណ៍ និងការបាញ់កាំជ្រួច ដែលធ្វើនៅបរិវេណវិមានឯករាជ្យ។
លោក ជាក់ ម៉េងហ៊ាង អភិបាលរងខេត្តមណ្ឌលគិរី ប្រាប់សារព័ត៌មាន Thmey Thmey 25 តាមទូរសព្ទថា ក្នុងថ្ងៃបុណ្យចូលឆ្នាំសកលខាងមុខនេះ រដ្ឋបាលខេត្តបានត្រៀមរៀបចំកម្មពិធីកម្សាន្តផ្សេង ដើម្បីផ្ដល់ភាពសប្បាយរីករាយដល់ពលរដ្ឋ និងភ្ញៀវទេសចរ។ បើតាមអភិបាលរងខេត្តរូបនេះ ចំពោះកន្លែងស្នាក់នៅវិញ មិនចោទជាបញ្ហាឡើយ ព្រោះបច្ចុប្បន្នខេត្តមណ្ឌលគិរី មានកន្លែងស្នាក់នៅច្រើនកន្លែងសម្រាប់ទទួលទេសចរ។
តាមការសង្កេតមើលរបស់លោកអភិបាលរង ក្នុងរយៈពេលចុងក្រោយនេះ ចំនួនទេសចរក្នុងខេត្តមណ្ឌលគិរី ហាក់ធ្លាក់ចុះ។ លោក ជាក់ ម៉េងហ៊ាង បានឱ្យដឹងថា មូលហេតុនៃការធ្លាក់ចុះ អាចដោយសារទេសចរណ៍សម្រុកទៅលេងតំបន់សមុទ្រ ក្រោយផ្លូវល្បឿនលឿនសាងសង់រួចរាល់។
ទោះជាយ៉ាងណា លោក ជាក់ ម៉េងហ៊ាង សង្ឃឹមថា ភ្ញៀវទេសចរនឹងត្រឡប់មកលេងខេត្តភូមិភាគឦសាននៅថ្ងៃចូលឆ្នាំសកល ព្រោះអាកាសធាតុនាចុងឆ្នាំនេះចុះត្រជាក់ល្អ។ ខេត្តមណ្ឌលគិរី ជាខេត្តសិ្ថតនៅភូមិភាគឦសាននៃប្រទេសកម្ពុជា ដែលមានព្រំប្រទល់ខាងកើតជាប់នឹងប្រទេសវៀតណាម ខាងជើងជាប់នឹង ខេត្តរតនគិរី និងមានចម្ងាយ៣៨០គីឡូម៉ែត្រ ពីរាជធានីភ្នំពេញ៕
Tag:
ទេសចរណ៍
មណ្ឌលគិរី
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
