ភ្នំពេញ៖ សាធារណរដ្ឋប្រជាមានិតចិន បានផ្ដល់វ៉ាក់សាំងការពារជំងឺឆ្លងសត្វចំនួន ១លានកម្រិតដល់ក្រសួងកសិកម្ម រុក្ខាប្រមាញ់ និងនេសាទ។ លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា សង្ឃឹមថាវ៉ាក់សាំងទាំងនេះ នឹងដើរតួនាទីជាវិជ្ជមានក្នុងការអភិវឌ្ឍលើវិស័យចិញ្ចឹមសត្វនៅកម្ពុជា។
ក្រសួងកសិកម្ម រុក្ខាប្រមាញ់ និងនេសាទ បានរៀបចំកម្មវិធីប្រគល់-ទទួលវ៉ាក់សាំងការពារជំងឺឆ្លងសត្វចំនួន១លានកម្រិត ដែលជាអំណោយរបស់ក្រសួងកសិកម្ម និងកិច្ចការជនបទ ចិន ជូនក្រសួងកសិកម្មកម្ពុជា នៅថ្ងៃទី២៧ ធ្នូនេះ។ អំណោយវ៉ាក់សាំងទាំងនេះ មានវ៉ាក់សាំងជំងឺអុតក្តាម ៣ប្រភេទ សម្រាប់គោក្របី ចំនួន ៥០ម៉ឺនកម្រិត និងវ៉ាក់សាំងជំងឺដុំពកលើស្បែកគោក្របីសរុប ៥០ម៉ឺនកម្រិត។
រូបភាពពីក្រសួងកសិកម្ម រុក្ខាប្រមាញ់ និងនេសាទ
នាឱកាសប្រគល់-ទទួលវ៉ាក់សាំង លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា វិស័យចិញ្ចឹមសត្វដើរតួនាទីយ៉ាងសំខាន់ក្នុងការបង្កើនប្រាក់ចំណូល លើកកម្ពស់ការរស់នៅ និងជំរុញសេដ្ឋកិច្ចជាតិ។ បើតាមរដ្ឋមន្រ្តីកសិកម្ម ការចិញ្ចឹមសត្វពឹងផ្អែកលើកត្តាពូជ ចំណី ការគ្រប់គ្រងសុខភាព និងការជំរុញទីផ្សារ។
លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ រូបភាពពីក្រសួងកសិកម្ម រុក្ខាប្រមាញ់ និងនេសាទ
លោក ឌិត ទីណា បន្ថែមថា កន្លងមកក្រសួងកសិកម្ម និងអគ្គនាយកដ្ឋានសុខភាពសត្វ និងផលិតកម្មសត្វ បានប្រឹងប្រែងជំរុញឱ្យវិស័យនេះ មានការរីកចម្រើន ប៉ុន្តែជួបបញ្ហាប្រឈមមួយចំនួន។ «ជំងឺឆ្លងសត្វ ជាឧបសគ្គចម្បង ដែលធ្វើឱ្យប៉ះពាល់ដល់ការចិញ្ចឹមសត្វ ការផ្គត់ផ្គង់សាច់ និងផលិតផលសត្វនៅលើទីផ្សារ។ កន្លងមកនៅកម្ពុជា មានផ្ទុះ និងឆ្លងរាលដាលនូវជំងឺមួយចំនួន ដូចជា អុតក្ដាម, ជំងឺសារទឹកគោក្របី, ជំងឺប៉េស្តជ្រូក, ជំងឺផ្ដាសាយបក្សី និងថ្មីៗនេះ ជំងឺដុំពកលើស្បែកគោក្របី បានធ្វើឱ្យប៉ះពាល់ដល់កសិករនៅតាមទីជនបទ។ មួយវិញទៀត មន្ទីរពិសោធន៍ និងធនធានមនុស្សនៅមានកម្រិត បានជះឥទ្ធិពលខ្លាំងដល់ការអភិវឌ្ឍវិស័យចិញ្ចឹមសត្វ»។ នេះជាការរៀបរាប់របស់លោក ឌិត ទីណា។
ការផ្ដល់អំណោយនេះ ធ្វើឡើងបន្ទាប់ពីកម្ពុជា និងចិន បានចុះកិច្ចព្រមព្រៀងលើការផ្ដល់ជំនួយវ៉ាក់សាំងសត្វ កាលពីថ្ងៃទី ៩ ខែវិច្ឆិកា ក្រោមអធិបតីភាពរបស់សម្តេច ហ៊ុន សែន និងលោក លឺ ខឺឈាំង នាយករដ្ឋមន្ត្រីចិន។ លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា មានប្រសាសន៍ថា ក្នុងរយៈពេលប៉ុន្មានឆ្នាំកន្លងមកនេះ កិច្ចសហប្រតិបត្តិការ រវាងចិន និងកម្ពុជាលើវិស័យសំខាន់ៗនៃកសិកម្មកម្ពុជា ដូចជាដំណាំ ការចិញ្ចឹមសត្វ នេសាទ កៅស៊ូជាដើម ត្រូវបានអនុវត្តយ៉ាងពេញលេញ និងទទួលបានផលិតផលជាផ្លែផ្កា។
រូបភាពពីក្រសួងកសិកម្ម រុក្ខាប្រមាញ់ និងនេសាទ
បើតាមឯកអគ្គរដ្ឋទូតចិនប្រចាំកម្ពុជា កិច្ចសហប្រតិបត្តិការរវាងភាគីទាំងពីរ នឹងមានភាពមមាញឹកខ្លាំង នៅខែមករា។ ជាមួយគ្នានេះ ភាគីទាំងពីរ នឹងមានការនាំចេញម្រេចទៅប្រទេសចិន ហើយនៅខែមីនា អ្នកជំនាញក្រុមទី២ នៃគម្រោងផែនការអភិវឌ្ឍកសិកម្មកម្ពុជា ដែលជាជំនួយរបស់ប្រទេសចិន នឹងមកដល់កម្ពុជាដើម្បីចាប់ផ្តើមការងារ។ ក្រៅពីនេះ ការងារនាំចេញកសិផល ដែលមានគុណភាពល្អប្រសើររបស់កម្ពុជា ដូចជាផលិតផលត្រចៀកកាំ និងដូង នឹងត្រូវអនុវត្តជាបន្តបន្ទាប់ផងដែរ។
លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា។ រូបភាពពីក្រសួងកសិកម្ម រុក្ខាប្រមាញ់ និងនេសាទរូបភាពពីក្រសួងកសិកម្ម រុក្ខាប្រមាញ់ និងនេសាទ២
តាមរយៈជំនួយវ៉ាក់សាំងការពារជំងឺឆ្លងសត្វនេះ លោក វ៉ាង វិនធាន សង្ឃឹមថាវ៉ាក់សាំងទាំងនេះ នឹងដើរតួនាទីជាវិជ្ជមានក្នុងការអភិវឌ្ឍលើវិស័យចិញ្ចឹមសត្វនៅកម្ពុជា។ សូមបញ្ជាក់ថា កាលពីថ្ងៃទី២៧ ខែតុលា កន្លងទៅ ចិន បានប្រារព្ធធ្វើពិធីសម្ពោធការនាំចេញផ្លែមៀនស្រស់របស់កម្ពុជា ទៅកាន់ប្រទេសចិន ដែលជាការបើកទ្វារសម្រាប់ការនាំចេញកសិផលរបស់កម្ពុជាទៅកាន់ប្រទេសចិន៕