ដោយ៖ ឡាយ ណាគ្រី(យុវជនឃុំក្បាលត្រាច)
ស្រុកក្រគរ, ពោធិ៍សាត់៖ ពេញមួយឆ្នាំក្នុងឆ្នាំ២០២២នៅក្នុងឃុំក្បាលត្រាច ស្រុកក្រគរ មានករណីរំលោភបំពានផ្លូវភេទលើកុមារីម្នាក់ តែមិនបានសម្រេច។
ជនបង្កស្ថិតក្នុងស្ថានភាពស្រវឹង ពេលប៉ុនប៉ងប្រព្រឹត្តអំពើល្មើសនេះ។ លោក ម៉ៅ រដ្ឋាមេប៉ុស្ដិ៍នគរបាលឃុំក្បាលត្រាច បញ្ជាក់ដូច្នេះ រួចបន្តថា ជនល្មើសត្រូវបានសមត្ថកិច្ចបានចាប់ខ្លួន
និងត្រូវផ្ដន្ទាទោសតាមច្បាប់។
បើតាម លោក ម៉ៅ រដ្ឋា ការប្រើប្រាស់គ្រឿងញៀន និងសេពគ្រឿងស្រវឹង គឺជាដើមហេតុ ដែលបង្កទៅជាការរំលោភបំពានផ្លូវភេទនេះ។ យ៉ាងណាក៏ដោយ នៅក្នុងរយៈពេល៣ឆ្នាំមកនេះ
ដែលលោកកាន់តំណែងជាមេប៉ុស្ដិ៍ មានករណីប៉ុនប៉ងរំលោភបំពានផ្លូវភេទមួយករណីប៉ុណ្ណោះ បានកើតឡើងនៅក្នុងឃុំក្បាលត្រាច។ មូលហេតុនៃការធ្លាក់ចុះ ត្រូវបាន មេប៉ុស្ដិ៍រូបនេះ
ពន្យល់ថាដោយសារតែការចុះផ្សព្វផ្សាយបញ្ជ្រាបការយល់ដឹង លើការការពារក្មេងស្រី និងស្ត្រី និងផ្លូវច្បាប់ជាដើមពីសំណាក់អាជ្ញាធរ។ លោក ម៉ៅ រដ្ឋា បន្ថែមថា៖ «នៅពេលយើងប្រឹងធ្វើ (បង្ក្រាប)បទល្មើសគ្រឿងញៀនទៅ បទល្មើស(រំលោភ)ក៏ថយ។ ហើយយើងបញ្ជ្រាបការងារផ្សព្វផ្សាយ»។
ថ្វីបើ បច្ចុប្បន្នករណីរំលោភបំពាននេះធ្លាក់ចុះក៏ដោយ ប៉ុន្តែបញ្ហានេះ នៅតែជាក្ដីកង្វល់មួយរបស់សមត្ថកិច្ច រួមទាំងពលរដ្ឋដែលរស់នៅក្នុងឃុំក្បាលត្រាចនេះដដែល ពិសេសស្ត្រី និងកុមារី។
ដើម្បីបញ្ចប់បញ្ហានេះកុំឱ្យកើតមានទៀត លោកមេប៉ុស្ដិ៍ ម៉ៅ រដ្ឋា បានរៀបចំផែនការចុះផ្សព្វផ្សាយបន្តដល់ពលរដ្ឋ ព្រមទាំងបង្កើនសកម្មភាពតាមដាន និងបង្ក្រាបមុខសញ្ញាសង្ស័យ។ ជាមួយគ្នានេះ លោក មេប៉ុស្ដិ៍ឃុំក្បាលត្រាច ក៏ទទូចឱ្យពលរដ្ឋ ជាពិសេសអាណាព្យាបាលដែលមានកូនស្រី ឱ្យបន្ថែមការយកចិត្តទុកដាក់ខ្ពស់ចំពោះកូន។ ប្រសិនបើមានករណីសង្ស័យ ត្រូវរាយការណ៍ដល់សមត្ថកិច្ចជាបន្ទាន់។ នេះជាការអំពាវនាវរបស់លោក ម៉ៅ រដ្ឋា ៕
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែតតាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែតនោះទេ)