លោកមេប៉ុស្ដិ៍អូរសណ្ដាន់ ត្រូវការកម្លាំងសមត្ថកិច្ចចំនួន ៦នាក់បន្ថែមទៀត ទើបគ្រប់គ្រាន់ក្នុងការចុះល្បាតតាមភូមិឃុំនីមួយៗ។ នៅក្នុងឃុំមានចំនួន ៨ភូមិ ក្នុងនោះមានភូមិអូរអាចម៍កុក ភូមិក្រាំងធំ ភូមិថ្នឹង ភូមិដូងជួរ ភូមិពុន្រ្ទាម ភូមិចុងខ្លុង ភូមិអូរតាប្រុក និងភូមិអូរសណ្ដាន់។
 

លោកបានបញ្ជាក់ថា៖« ខ្ញុំមានកម្លាំងតែ ២នាក់ មិនគ្រប់គ្រាន់ទេ។ ពេលចុះល្បាតមានបញ្ហាខ្លះៗ តែខ្ញុំមានកម្លាំងការពារភូមិគាត់ជួយ និងការសហការពីប្រជាពលរដ្ឋ​»។

បើទោះបីខ្វះកម្លាំងដើម្បីធ្វើការងារក្ដី លោក ម៉ូ បានរៀបចំផែនការការងារទៅតាមធនធានមនុស្សដែលមាន គឺកម្លាំងម្នាក់ ត្រូវនៅប្រចាំការក្នុងប៉ុស្ដិ៍ជាប់ជាប្រចាំ និងម្នាក់ទៀត ត្រូវចុះដើរល្បាតតាមភូមិគោលដៅនីមួយៗ ជាមួយប្រជាការពារភូមិ។ លោកមេប៉ុស្ដិ៍លើកឡើងបែបនេះ ហើយបន្តថា កម្លាំងការពារតិច តែមានការចូលរួម និងសហការពីប្រជាពលរដ្ឋនៅតាមភូមិច្រើន ដូច្នេះពុំសូវមានបញ្ហាអ្វីកើតឡើងនៅក្នុងឃុំនោះទេ។

សព្វថ្ងៃប៉ុស្ដិ៍នគរបាលអូរសណ្ដាន់ ពឹងផ្អែកទៅលើកម្លាំងបញ្ហាការពារភូមិច្រើន ដើម្បីជួយរាយការណ៍ និងចុះជួយអន្តរាគមន៍តាមភូមិនីមួយៗជាមួយនឹងកម្លាំងប៉ុស្ដិ៍ម្នាក់ទៀត ដែលត្រូវចុះល្បាតតាមភូមិ។ កម្លាំងការពារភូមិមានច្រើន មានតិចទៅតាមភូមិនីមួយៗ ដោយមួយមានចាប់ពី ៥ទៅ ១៥នាក់ ដែលជួយសម្រាលបន្ទុកដល់ប៉ុស្ដិ៍ផងដែរ។ នេះបើតាមលោក ឈ៊ីន ម៉ូ។

លោក ម៉ូ បានបញ្ជាក់ថា ការខ្វះកម្លាំងសមត្ថកិច្ច ទើបតែខ្វះនៅឆ្នាំ២០២២ ព្រោះដោយសារមានអ្នកនិវត្តន៍ និងផ្ដាស់ប្ដូរការងារច្រើន។ កន្លងមកនៅក្នុងឃុំមានកម្លាំងសមត្ថកិច្ច ៦នាក់ ដែលបំពេញការងារប្រចាំថ្ងៃ។
 

ជុំវិញការខ្វះកម្លាំងសមត្ថកិច្ចនេះ លោកមេប៉ុស្ដិ៍បានដាក់លិខិតស្នើទៅខាងក្រសួងមហាផ្ទៃហើយ តែពុំទាន់បានបញ្ជូនមកនោះទេ ដោយលោកកំពុងរង់ចាំមើលនៅឆ្នាំ២០២៣នេះ ប្រហែលជាអាចនឹងមានកម្លាំងសមត្ថិកិច្ចបន្ថែម៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ