ក្រុងសំរោង, ឧត្ដរមានជ័យ៖ អំពើចោរកម្មស្ទើរតែមិនមានកើតមានឡើងឡើយនៅក្នុងភូមិសាស្ត្រសង្កាត់បន្សាយរាក់ ក្រុងសំរោង កាលពីឆ្នាំ២០២២កន្លងទៅ។ លោក ម៉ែន សំ នាយប៉ុស្ដិ៍នគរបាលសង្កាត់បន្សាយរាក់ ក្នុងឆ្នាំកន្លងទៅនេះ មានករណីលួចម៉ូតូតែមួយករណីប៉ុណ្ណោះ ដោយសារការធ្វេសប្រហែសរបស់ជនរងគ្រោះ។ ​

 

នាកិច្ចចសម្ភាសន៍ជាមួយយុវជនសង្កាត់បន្សាយរាក់ លោក ម៉ែន សំ និយាយថា ប៉ុន្មានឆ្នាំចុងក្រោយនេះ ក្នុងមូលដ្ឋានខ្លួន មិនមានបញ្ហាប្រឈមអំពើចោរកម្មនោះឡើយ គឺទើបមានមួយករណីប៉ុណ្ណោះ ជាករណីលួចម៉ូតូបានសម្រេច។ 

 

ការបាត់ម៉ូតូនេះ ដោយសារពលរដ្ឋ មិនបានប្រុងប្រយ័ត្ន ដោយដាក់ម៉ូតូចោលនៅលើផ្លូវ រួចចូលទៅចម្ការ ពីរសៀល(ម៉ោង១ថ្ងៃ) ដល់ល្ងាច ព្រមទាំងមិនចាក់សោរកម៉ូតូទៀត។ ជនរងគ្រោះមិនស្គាល់ផ្លាកលេខម៉ូតូខ្លួន និងមិនមានកាតគ្រីម៉ូតូ ដោយសារជាម៉តូបង់រំលស់នេះបើតាមនាយប៉ុស្ដិ៍នគរបាលសង្កាត់បន្សាយរាក់ ដោយលោកបានបន្តទៀតថា មូលហេតុខាងលើនេះ ធ្វើឱ្យសមត្ថកិច្ចក៏មិនអាច​រកជនដែលលួចឃើញដែរ។ 
 

ជាមួយគ្នានេះ លោក ម៉ែន សំ សំណូមពរពលរដ្ឋគួរមានការប្រុងប្រយ័ត្ន ដោយខ្លួនឯងបន្ថែម ក្រៅតែពីកម្លាំងសមត្ថកិច្ច។ កុំឱ្យពលរដ្ឋមានគំនិត «សុវត្ថិភាពនិយមពេក»។ លោកក៏អំពាវនាវ ឱ្យពលរដ្ឋក្នុងឃុំគួរកុំធ្វេសប្រហែសឱ្យសោះ ព្រោះជនឈ្លៀតឱកាស និងចេញសកម្មភាពគ្រប់ពេលវេលាបាន៕

 

 អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ