លោក ម៉ម ធន បានបញ្ជាក់ថា ក្នុងរដូវវស្សាមួយឆ្នាំៗ មានការខូចខាតតិចតួច ប៉ុន្តែឆ្នាំនេះភូមិពុទ្ទ្រាម និងភូមិដូងជួរ ខូចខាតរាប់គីឡូម៉ែត្រ។ ចំពោះទីតាំងដែលមិនទាន់ជួសជុល និងមិនទាន់ធ្វើ គឺមានភូមិអូរតាប្រុក និងភូមិពុទ្ទ្រាម ដោយសារឃុំគ្មានលទ្ធភាព។ ជុំវិញបញ្ហានេះ លោកមេឃុំ បានស្នើឱ្យប្រជាពលរដ្ឋនៅក្នុងឃុំ ដែលមានលទ្ធភាពជួយលុបកន្លែងដែលខូចខាតតិចតួចនៅមុខផ្ទះរបស់ខ្លួន ហើយទីតាំងដែលខូចខាតខ្លាំង គឺឃុំនឹងប្រើមូលនិធិឃុំ និងកៀរគរសប្បុរសជននានា ដើម្បីស្ថាបនាផ្លូវឡើវិញ។ ​

ជុំវិញកិច្ចការជួសជុលផ្លូវ និង​ហេដ្ឋារចនាសម្ព័ន្ធនានាដែលខូចខាត លោក មេឃុំ បានលើកឡើថា អាជ្ញាធរឃុំ បានប្រើប្រាស់ប្រាក់មូលនិធិរបស់ឃុំ ដើម្បីកែលម្អឱ្យវាមានភាពល្អប្រសើរឡើងវិញ។ មេឃុំរូបនេះបន្តថា ក្នុងឆ្នាំកន្លងទៅ ឃុំអូរសណ្ដាន់បានសម្រេច​សមិទ្ធផល​សាងសង់ផ្លូវលំចំនួន ៣ខ្សែ ដែលមានប្រវែងសរុបជាង ១១គីឡូម៉ែត្រ ​ស្ថិតក្នុងភូមិសាស្ត្រភូមិក្រាំងធំ ភូមិអូរអាចម៍កុក និងភូមិពុទ្ធ្រាម ដោយប្រើប្រាស់ថវិកាមូលនិធិឃុំ។ ទន្ទឹមនឹងនេះ ឃុំក៏បានដាក់លូចំនួន៤កន្លែង និងកំពុងជួសជុលផ្លូវថ្នល់ដែលខូចខាតនៅក្នុងឃុំជាបន្តបន្ទាប់ទៀតដែរ។

​

លោក ម៉ម ធន បន្ថែមថា ដើម្បីជួសជុលផ្លូវឡើងវិញ អាជ្ញាធរឃុំ បានរៀបចំវេទិកាសាធារណៈ​ដើម្បីស្រង់នូវតម្រូវការរបស់ពលរដ្ឋ និងពន្យល់ណែនាំឱ្យពលរដ្ឋ បានយល់ពីផែនការរបស់ឃុំ ដែលនឹងត្រូវអនុវត្តភូមិឃុំនីមួយៗ ព្រោះពលរដ្ឋខ្លះ ពុំសូវយល់ដឹងនោះទេ៕

​​

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ 
 

 

​