ក្រគរ,ពោធិ៍សាត់៖ «មហារីកមាត់ស្បូន» គឺជាជំងឺកើតញឹកញាប់បំផុតលំដាប់ទីពីរ បន្ទាប់ពីមហារីកដោះ ក្នុងចំណោមស្ត្រី។ តែស្ត្រីអាចចៀសវាងបាន តាមរយៈការតាមដានពិនិត្យ រកមើល កោសិកាមហារីកមាត់ស្បូន និងការចាក់វ៉ាក់ស៊ាំងការពារវីរុស HPV (Human Papillomavirus) ដែលអាចបង្កជាជំងឺ មហារីកមាត់ស្បូននៅពេលវាវវិវត្តន៍ច្រើនឆ្នាំ។

ពពួកវីរុស HPV នេះជាមូលហេតុបង្កឱ្យមាន​ដំបៅមាត់ស្បូនដែលឈានទៅរក​មហារីក រហូតដល់ទៅ៩៥ភាគរយ។ ប៉ុន្តែវានៅមានកត្តារួមផ្សំជាច្រើនទៀតដែលកើតជំងឺនេះដូចជា ការរួមភេទវ័យក្មេងពេក ការមានដៃគូរួមភេទច្រើន ការឆាប់មានគភ៌នៅអាយុវ័យក្មេង​ ការមានកូនច្រើន ការជក់បារី កង្វះជាតិវីតាមីន ឬអ័រម៉ូន ការប្រើថ្នាំ​ពន្យាកំណើត​និងការឆ្លងជំងឺកាមរោគផ្សេងៗទៀត។
​ 

បច្ចុប្បន្ន នៅមណ្ឌលសុខភាពក្រគរស្ថិតក្នុងឃុំក្បាលត្រាច ស្រុកក្រគរ ខេត្តពោធិ៍សាត់ក៏មានផ្ដល់សេវាពិនិត្យមហារីកមាត់ស្បូននេះផងដែរ។ ក្រៅពីនោះ នៅមណ្ឌលសុខភាពនេះ ពលរដ្ឋ​អាចមករកសេវាជំងឺមួយចំនួនដូចជា ផ្នែកពិគ្រោះជំងឺក្រៅ(OPD), ជំងឺទូទៅ, ពិនិត្យផ្ទៃពោះទាំងមុន និងក្រោយសម្រាល, សេវាពន្យារកំណើត,ការផ្ដល់ថ្នាំបង្ការជំងឺ១១មុខដល់កុមារ

និងចាក់វ៉ាក់សាំងការពារជំងឺកូវីដ-១៩, និងជួសឈាមរកមេរោគ(មេរោគអេដស៍, របេង, ជាតិស្ករ...)។ 
 

ជាប្រចាំនៅមណ្ឌលសុខភាពទទួលព្យាបាលអ្នកជំងឺជាង១ពាន់នាក់ក្នុងមួយខែៗ។ ក្នុងនោះអ្នកជំងឺភាគច្រើនជំងឺក្អក ផ្ដាសាយ និងរលាកផ្លូវដង្ហើម។ នៅមណ្ឌលសុខភាពក្រគរ បច្ចុប្បន្នកំពុងផ្ដល់សេវា ទៅដល់ពលរដ្ឋចំនួន២ឃុំ គឺពលរដ្ឋឃុំអន្លង់ត្នោត និងពលរដ្ឋឃុំក្បាលត្រាច។ ឃុំទាំង២នេះមានប្រជាជនជាង២ម៉ឺននាក់៕
 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ