លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងថា ក្រសួង បានសាងសង់ និងជួសជុលផ្លូវជាតិកម្រិត១ បាន ៩ខ្សែ មានប្រវែងជាង ២០០០គីឡូម៉ែត្រ, ផ្លូវជាតិកម្រិត២ ចំនួន ៧២ខ្សែ ប្រវែងជាង ៥០០០គីឡូម៉ែត្រ និងផ្លូវខេត្តចំនួន ៧៥០ខ្សែ ប្រវែងជាង ១ម៉ឺនគីឡូម៉ែត្រ។
  

 

លោក ស៊ុន ចាន់ថុល បានថ្លែងក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ នៅថ្ងៃទី១៥-១៦ ខែកុម្ភៈ ឆ្នាំ២០២៣ នៅទីស្តីការក្រសួង ដូច្នេះថា៖« គិតមកដល់បច្ចុប្បន្ននេះ ផ្លូវជាតិ និងផ្លូវខេត្តចំនួន ៨៣១ខ្សែ ដែលបានស្ថាបនា និងជួសជុលនៅឆ្នាំ២០២២ មានប្រវែង ១៩ ៧៩៥ គីឡូម៉ែត្រ ក្នុងនោះក្រាលកៅស៊ូ និងបេតុងសរុប ១១ ០៤២គីឡូម៉ែត្រ ស្មើនឹង ​៥៦ភាគរយ នៃប្រវែងផ្លូវសរុប»។
 

ក្រសួង ក៏បានបើកការដ្ឋានគម្រោងស្ដារ និងលើកកម្រិតគុណភាពផ្លូវជាតិលេខ៤៨, ផ្លូវជាតិលេខ៤១, ផ្លូវជាតិលេខ៣១, ផ្លូវជាតិលេខ៣៣, កំណាត់ផ្លូវជាតិលេខ៧(ស្គន់-ក្រុងកំពង់ចាម), គម្រោងសាងសង់ស្ពានឆ្លងកាត់ទន្លេមេគង្គ ខេត្តក្រចេះ និងផ្លូវតភ្ជាប់ទៀតផង។ 
 

រដ្ឋមន្រ្តីរូបនេះ បន្តថា ក្រៅពីស្ថាបនា និងជួសជុលផ្លូវ ក្រសួងបានចុះអនុស្សរណៈយោគយល់គ្នាលើគម្រោងសាងសង់ផ្លូវល្បឿនលឿនភ្នំពេញ-ក្រុងបាវិតជាមួយក្រុមហ៊ុនសាជីវកម្មស្ពាន និងថ្នល់ចិន(CRBC) នៅថ្ងៃទី១៦ ខែកញ្ញា ឆ្នាំ២០២២ ។ 
 

បច្ចុប្បន្ន ក្រសួងសាធារណការ និងដឹកជញ្ជូន និងក្រុមហ៊ុន សាជីវកម្មស្ពាននិងថ្នល់ចិន(CRBC) បានបញ្ចប់ការចរចា និងឯកភាពលើកិច្ចព្រមព្រៀងភាពជាដៃគូរវាងរដ្ឋនិងឯកជន(PPP) ដែលគ្រោងនឹងស្នើចុះហត្ថលេខានាពេលឆាប់ៗខាងមុខនេះផងដែរ។
 

សូមជម្រាបថា នាពេលថ្មីៗនេះ រដ្ឋាភិបាលចិន បានប្រកាសផ្ដល់ជំនួយឥតសំណងដល់កម្ពុជាចំនួន ៣០០លានយ័ន(ប្រមាណ៤៤លានដុល្លារអាម៉េរិក) សម្រាប់អនុវត្តគម្រោងផ្លូវដែក៕
 

 

គួរបញ្ជាក់ថា ផ្លូវល្បឿនលឿនភ្នំពេញ-ក្រុងព្រះសីហនុ បានបើកឱ្យប្រើប្រាស់ជាផ្លូវការ នៅថ្ងៃទី៩ ខែវិច្ឆិកា ឆ្នាំ២០២២។