ក្រោយកិច្ចចរចារំសាយកម្មវិធីនុយក្លេអ៊ែរត្រូវជាប់គាំង នៅក្នុងឆ្នាំ២០១៩ កូរ៉េខាងជើង បានបាញ់មីស៊ីលជាច្រើនលើក។ នៅថ្ងៃទី១៨ ខែកុម្ភៈ កូរ៉េខាងជើង បានបាញ់មីស៊ីលបាលីស្ទិកអន្តរទ្វីប Hwasong-15 លើកដំបូង បើគិតចាប់ពីខែវិច្ឆិកា ឆ្នាំ២០២២កន្លងមក។ 

 

តាមការចុះផ្សាយរបស់ទីភ្នាក់ងារព័ត៌មាន KCNA មីស៊ីលនោះ ត្រូវបានបាញ់នៅអាកាសយានដ្ឋានអន្តរជាតិ ក្នុងក្រុងព្យុងយ៉ាង។ មីស៊ីលអន្តរទ្វីបនោះ ហោះបាន៩៨៩គីឡូម៉ែត្រ ក្នុងរយៈពេល ៤០១៥វិនាទី ក្នុងកម្ពស់ ៥៧៦៨,៥គីឡូម៉ែត្រ។ 

 

ដោយមើលឃើញពីការគំរាមកំហែងពីសំណាក់អាម៉េរិក នីងកូរ៉េខាងត្បូង រដ្ឋាភិបាលក្រុងព្យុងយ៉ាង បានបញ្ជាឱ្យកម្លាំងយោធាគ្រប់ផ្នែកទាំងអស់ទទួលបន្ទុកកិច្ចការមីស៊ីល ត្រូវត្រៀមខ្លួនឱ្យរួចជាស្រេចនៅក្នុងការប្រយុទ្ធ។ 

 

សូមបញ្ជាក់ថា កូរ៉េខាងជើង នៅថ្ងៃទី១៧ ខែកុម្ភៈ បានព្រមានថា កូរ៉េខាងត្បូង និងអាម៉េរិក នឹងប្រឈមការប្រឆាំងតបដ៏ខ្លាំងក្លា ប្រសិនបើប្រទេសទាំងពីរ បន្តអនុវត្តផែនការធ្វើសមយុទ្ធយោធារួមគ្នា។ កូរ៉េខាងជើង ក៏បានចោទសមយុទ្ធនោះផងដែរថា ធ្វើឱ្យមានភាពតានតឹងនៅក្នុងតំបន់៕