បើតាមក្រសួងវប្បធម៌ និងវិចិត្រសិល្បៈ​ គ្រឿងអលង្ការមាស និងលោហៈទាំងនោះរួមមាន ក្បាំងមកុដ ខ្សែក ខ្សែដៃ ខ្សែក្រវាត់ ក្រវិល បន្តោង។ វត្ដុបុរាណទាំងនោះទៀតសោត ស្ថិតក្នុងសម័យមុនអង្គរ និងសម័យអង្គរ ដែលសាធារណជនភាគច្រើនមិនធ្លាប់បានឃើញពីមុនមក។

បើតាមក្រសួងវប្បធម៌ វត្ថុបុរាណទាំងនោះ ត្រូវបានបាត់ពីកម្ពុជាអស់ជាច្រើនឆ្នាំ និងបាត់ក្នុងអំឡុងសង្គ្រាមក្នុងប្រទេសជាច្រើនទស្សវត្សរ៍កន្លងមក។ ការវិលត្រឡប់មកវិញនៃវត្ថុបុរាណទាំងនេះ​ ត្រូវបានលោកស្រី ភឿង សកុណា រដ្ឋមន្ត្រីក្រសួងវប្បធម៌ថា​​ ជាការបើកទំព័រថ្មី ក្នុងការស្វែងយល់ និងសិក្សាស្រាវជ្រាវអំពីចក្រភពអង្គរ និងសារៈសំខាន់ នៃបេតិកភណ្ឌទាំងនោះ សម្រាប់ពិភពលោក។ 
 

ជាមួយគ្នានេះ រដ្ឋមន្ត្រីក្រសួងវប្បធម៌ ក៏បានលើកទឹកចិត្តដល់បុគ្គលឯកជន សារមន្ទីរ ស្ថាប័ននានាលើសាកលលោក ដែលកំពុងតាំងបង្ហាញ និងរក្សាវត្ថុបុរាណរបស់កម្ពុជា សូមសហការជារដ្ឋាភិបាលកម្ពុជា តាមរយៈក្រសួងវប្បធម៌ ស្ថានទូតកម្ពុជាប្រចាំតាមបណ្ដាប្រទេស ក្នុងការប្រគល់ត្រឡប់មកកម្ពុជាវិញ។ ព្រមជាមួយគ្នានេះ ក្រសួងក៏នឹងបន្តធ្វើការស្រាវជ្រាវ និងនាំយកសម្បត្តិវប្បធម៌ជាតិ ដែលបានបាត់បង់ ត្រឡប់មកកម្ពុជាវិញផងដែរ។ 
 

គួរជម្រាបផងដែរថា ការប្រគល់រតនសម្បត្តិវប្បធម៌ទាំងនេះ គឺអនុលោមតាមកិច្ចព្រមព្រៀងកាលពីខែកញ្ញា ឆ្នាំ២០២០ រវាងក្រសួងវប្បធម៌ និងវិចិត្រសិល្បៈ និងគ្រួសារលោក ឌូគ្លាស ឡាតហ្វដ។ កន្លងមកកម្ពុជា ក៏ធ្លាប់ទទួលបានវត្ថុបុរាណពីថ្ម និងសំរឹទ្ធមួយចំនួន ត្រឡប់មកវិញផងដែរ ពីប្រទេសអង់គ្លេសកាលពីខែកញ្ញា ឆ្នាំ២០២១៕