គ្រឹះស្ថានអង្គរ បានបញ្ជាក់ថា រយៈពេល២ខែនៃឆ្នាំ២០២៣នេះ មានទេសចរសរុប ១៥៦ ៩៥១នាក់ បានទិញសំបុត្រចូលរមណីយដ្ឋានអង្គរ ដែលកើន ១៤៤៥ភាគរយ ធៀបនឹងរយៈពេលដូចគ្នាក្នុងឆ្នាំ២០២២។ ចំណូលជាង ៧លានដុល្លារដែលគ្រឹះស្ថានអង្គរទទួលបាន ត្រូវបានបរិច្ចាគទៅកាន់មន្ទីរពេទ្យគន្ធបុប្ផាចំនួន ៣១៣ ៩០២ដុល្លារ។ នេះបើតាមសេចក្ដីប្រកាសព័ត៌មានរបស់គ្រឹះស្ថានអង្គរ។ 
 

ដោយឡែក ក្នុងខែកុម្ភៈ  មានទេសចរ ៧៩ ៥១៥នាក់ បានទិញបណ្ណចូលទស្សនារមណីយដ្ឋានអង្គរ ហើយចំណូលលក់សំបុត្រនោះមាន ៣ ៧៤៣ ២៩៤ដុល្លារ។ 

ក្រៅពីនេះ គ្រឹះស្ថានអង្គរ ក៏បានលក់សំបុត្រចូលទស្សនាតំបន់កោះកែរ បានចំនួន ២១ ៥១០ដុល្លារដែរ ដល់ទេសចរអន្តរជាតិចំនួន ១ ៤៣៤នាក់ ក្នុងខែកុម្ភៈ។ ទន្ទឹមនឹងនេះ ចំណូលពីការលក់សំបុត្រទូក នៅកំពង់ផែចុងឃ្លៀស ក្នុងខែកុម្ភៈ មានចំនួន ១១៩ ០៦២ដុល្លារផងដែរ៕