កិច្ចព្រមព្រៀងនាំចេញគ្រាប់ធញ្ញជាតិ ដែលត្រូវបានសម្រួបសម្រួលដោយតួកគី និងអង្គការសហប្រជាជាតិ នៅក្នុងខែកក្កដាកន្លងទៅ នឹងអាចបន្តជាថ្មីនៅថ្ងៃទី១៨ ខែមីនា ប្រសិនបើភាគីអ៊ុយក្រែន និងរុស្ស៊ី មិនបានជំទាស់។ ក្នុងដំណើរទស្សនកិច្ចនៅក្រុងកៀវ លោក អាន់តូនីញ៉ូ ហ្គូតេរ៉េស អគ្គលេខាធិការអង្គការសហប្រជាជាតិ បានជំរុញឱ្យបន្តជាថ្មី។ 

 

«ខ្ញុំចង់បញ្ជាក់ពីភាពចាំបាច់នៃការបន្តគំនិតផ្តួចផ្តើមនាំចេញគ្រាប់ធញ្ញជាតិសមុទ្រខ្មៅ នៅថ្ងៃទី១៨ ខែមីនា»។ លោក ហ្គូតេរ៉េស បានសង្កត់ធ្ងន់បែបនេះ នៅក្នុងជំនួបជាមួយប្រធានាធិបតី វ៉ូឡូឌីមៀ ហ្សេលេនស្គី នៅក្រុងកៀវ ក្នុងថ្ងៃទី១៨ ខែមីនា ដោយបន្តពីសារៈសំខាន់នៃការធ្វើការជាមួយគ្នាក្រោមលក្ខខណ្ឌដ៏សំខាន់លើការប្រើប្រាស់ហេដ្ឋារចនាសម្ព័ន្ធនាំចេញ តាមរយៈសមុទ្រខ្មៅ ដោយផ្អែកលើគំនិតផ្តួចផ្តើម។ នេះបើតាមការចុះផ្សាយរបស់ទីភ្នាក់ងារព័ត៌មាន Tass។ 

 

ទន្ទឹមនេះ អគ្គលេខាធិការអង្គការសហប្រជាជាតិ បានបញ្ជាក់ផងដែរថា គ្រាប់ធញ្ញជាតិប្រមាណ ២៣លានតោន ត្រូវបាននាំចេញពីកំពង់ផែអ៊ុយក្រែន ដោយផ្អែកលើកិច្ចព្រមព្រៀង។ ត្រង់ចំណុចនេះ លោកហ្គូតេរ៉េស ទំនងចង់មានន័យថា ការនាំចេញនេះ អាចជួយដល់ពិភពលោក ដែលកំពុងរងនឹងវិបត្តិខ្វះស្បៀងអាហារ ដោយសារតែសង្រ្គាម និងជំងឺឆ្លងសកលនៅពេលកន្លងមក។ 

 

បន្ថែមពីនេះ ប្រមុខអង្គការសហប្រជាជាតិ បានជំរុញ​ឱ្យមានការនាំចេញអាហារពីអ៊ុយក្រែន និងរុស្ស៊ីបន្ថែម ដើម្បីធានាពីសន្តិសុខស្បៀងសកល និងតម្លៃអាហារ។ 

 

សូមបញ្ជាក់ថា ការបន្តកិច្ចព្រមព្រៀងនាំចេញគ្រាប់ធញ្ញជាតិចុងក្រោយ នៅក្នុងខែវិច្ឆិកា ឆ្នាំ២០២២កន្លងទៅ។ កាលនោះ រុស្ស៊ីបានព្រមានដកខ្លួនចេញពីកិច្ចព្រមព្រៀងនាំចេញគ្រាប់ធញ្ញជាតិខាងលើ រហូតទាល់តែមានការលើកចោលទណ្ឌកម្ម។ យ៉ាងណាមិញ រុស្ស៊ីនៅតែបន្តកិច្ចព្រមព្រៀងដដែល៕