គណបក្សកាន់អំណាច Georgian Dream party ក្នុងប្រទេសហ្សកហ្ស៊ីបាននិយាយនៅក្នុងសេចក្តីថ្លែងការណ៍មួយដែលបានបង្ហោះក្នុងគេហទំព័ររបស់ខ្លួនថា ក្នុងឋានៈ«ជាគណបក្សរបស់រដ្ឋាភិបាលមួយដែលមានការទទួលខុសត្រូវលើសមាជិកសង្គមគ្រប់រូបនោះ យើងបានសម្រេចដកចេញច្បាប់នេះដោយគ្មានលក្ខខណ្ឌ»។

 

ការប្រឆាំងជាដំបូងបានផ្ទុះឡើង ខណៈពេលដែលក្រុមសមាជិកសភាប្រទេសហ្សកហ្ស៊ីបានពិនិត្យច្បាប់ដ៏ចម្រូងចម្រាសមួយនេះកាលពីថ្ងៃទី៧ ខែមីនា កន្លងទៅ។

 

សេចក្តីស្នើច្បាប់នេះដែលគាំទ្រដោយគណបក្សកាន់អំណាច Georgian Dream party ត្រូវបានអនុម័តយ៉ាងប្រញាប់ប្រញាល់ កាលពីថ្ងៃទី៧ មីនាដែលបង្ខំឱ្យអង្គការសង្គមស៊ីវិលនានាដែលទទួលថវិកាជាង២០ភាគរយពីបរទេសត្រូវចាត់ទុកថាជា«ភ្នាក់ងារបរទេស»។
 

ច្បាប់នេះបានបណ្តាលឱ្យមានការផ្ទុះកំហឹងយ៉ាងខ្លាំងក្នុងចំណោមពលរដ្ឋហ្សកហ្ស៊ី ហើយបានធ្វើការប្រឆាំងតវ៉ា និងទទួលបានការបង្រ្កាបដោយក្រុមកម្លាំងសន្តិសុខ និងប៉ូលិសដោយបានប្រើប្រាស់ឧស្ម័នបង្ហូរទឹកភ្នែក ដំបងឆក់ និងកាណុងបាញ់ទឹកជាដើម។

 

ក្រុមបាតុករដែលត្រូវបានគេឮស្រែកថា «កុំធ្វើតាមច្បាប់រុស្ស៊ី» បានច្រៀងបទភ្លេងជាតិហ្សកហ្ស៊ី អ៊ុយក្រែន និងសហភាពអឺរ៉ុបផងដែរ។ មានបដាតវ៉ាមួយដែលបង្ហាញក្នុងការធ្វើបាតុកម្មបន្តទៀតក្នុងអំឡុងពេលនៃទិវានារី ៨ មីនា ថា «ស្ត្រីប្រឆាំងនឹងការត្រួតត្រាផ្តាច់ការ»។

 

ប្រតិភូសហភាពអឺរ៉ុបប្រចាំក្នុងប្រទេសហ្សកហ្ស៊ីបាននិយាយក្នុងសារបង្ហោះតាម Twitter ថា ខ្លួនស្វាគមន៍សេចក្តីប្រកាសរបស់គណបក្ស Georgian Dream party៕