ដោយ៖ សែម ប្រាក់ដាវ
 

 

 

«ភ្នំគូលែន» មានសក្តានុពលក្នុងការផ្គត់ផ្គង់ទឹកសាប និងទឹកក្រោមដីសម្រាប់ក្រុងសៀមរាប។ ស្ទឹងសៀមរាប ក៏កើតឡើងដោយសារការប្រសព្វគ្នារវាងអូរធំ និងអូរក្បាលស្ពានផងដែរ។ ជាមួយគ្នានេះ ស្ទឹងសៀមរាប ហូរកាត់ក្បែរប្រាសាទអង្គរវត្ត ហើយទឹកស្ទឹងនេះហូរបំពេញបារាយណ៍ ចុះទៅទន្លេសាប។ ទឹកស្ទឹងសៀមរាបនេះ ក៏បានផ្តល់ជាប្រភពទឹកក្រោមដី សម្រាប់រក្សាលំនឹងប្រាសាទអង្គរវត្តដែរ។

 

លោក ហង់ ពៅ អគ្គនាយក នៃអាជ្ញាធរជាតិអប្សរា បានថ្លែងដូច្នេះ៖ «បើយើងហៅស្ទឹងសៀមរាបនេះដោយក្ដីគោរព យើងហៅប្រឡាយបុរាណសៀមរាប។ ការហៅ ប្រឡាយបុរាណសៀមរាបនេះ មានតម្លៃជាងហៅ ស្ទឹងសៀមរាប»។ 

 

ក្រៅពីនេះ ស្ទឹងសៀមរាប ជាស្នាដៃរបស់មនុស្សនាសម័យបុរាណ។ តាមពិតទៅ ស្ទឹងបុរាណ ធ្វើឡើងដោយធម្មជាតិភាគច្រើន មិនដែលត្រង់នោះទេ។ ស្ទឹងធម្មជាតិ តែងតែបត់ចុះបត់ឡើង។ ទន្ទឹមនឹងនោះ ស្ទឹងសៀមរាប សព្វថ្ងៃជាស្ទឹងចុះពីចំណុចខាងជើងនៃអង្គរមកត្រង់។ ដូច្នេះចំណុចដែលត្រង់នៃស្ទឹងនេះមិនមែនស្ទឹងធម្មជាតិនោះទេ គឺធ្វើឡើងដោយមនុស្ស៕