បើទោះបីតម្រូវការពិភពលោកចុះខ្សោយក៏ដោយ ក៏សេដ្ឋកិច្ចកម្ពុជា មានដំណើរការល្អនៅឆ្នាំ២០២២ ដែលជំរុញដោយការងើបឡើងវិញនៃវិស័យទេសចរណ៍ កំពុងបន្តមកទល់បច្ចុប្បន្ន។ នេះជាការលើកឡើងរបស់លោកស្រី Jyotsana Varma នាយិកាប្រចាំកម្ពុជារបស់ADB ដែលបានបញ្ជាក់ថា  ទស្សនវិស័យសេដ្ឋកិច្ចរបស់កម្ពុជា មានភាពវិជ្ជមានជាមួយនឹងកំណើនដ៏រឹងមាំ ឱនភាពគណនីចរន្តរួមតូច និងមានកម្រិតអតិផរណាមធ្យម នៅឆ្នាំ២០២៣។

 

សេចក្តីប្រកាសព័ត៌មានរបស់ ABD ស្តីពី៖ ទស្សនវិស័យអភិវឌ្ឍន៍អាស៊ី (Asian Development Outlook/ADO) ដែលចេញផ្សាយនាថ្ងៃទី៤មេសា បានបង្ហាញថា វិស័យទេសចរណ៍ ត្រូវបានរំពឹងថានឹងកើនឡើង៧,៣ភាគរយ ក្នុងឆ្នាំ២០២៣។ សម្ពាធអតិផរណា ត្រូវបានរំពឹងថា នឹងធ្លាក់ចុះមកអត្រាជាមធ្យម ៣ភាគរយ ក្នុងឆ្នាំ២០២៣ និង ៤ភាគរយក្នុងឆ្នាំ ២០២៤។

 

របាយការណ៍ទស្សនវិស័យអភិវឌ្ឍន៍អាស៊ី ក៏បានបង្ហាញលទ្ធផលនៃកិច្ចខិតខំប្រឹងប្រែងបន្តបន្ទាប់របស់កម្ពុជា ក្នុងការបង្កើនការវិនិយោគបៃតង ដើម្បីទទួលបានសក្ដានុពលកំណើនរយៈពេលវែងផងដែរ។ សម្រាប់ផលិតផលឧស្សាហកម្ម ត្រូវរំពឹងមានកំណើន៥,៨ភាគរយក្នុងឆ្នាំ២០២៣ ហើយហក់ដល់៧,៨ភាគរយក្នុងឆ្នាំ២០២៤។ រីឯ វិស័យកសិកម្មក៏ត្រូវបានរំពឹងមានកំណើន១,១ភាគរយ នៅក្នុងឆ្នាំ២០២៣ និង ១,២ភាគរយ ក្នុងឆ្នាំ២០២៤ ដែលជំរុញដោយទិន្នផលដំណាំសម្រាប់ការនាំចេញ។

 

ដ្បិតវិស័យដែលទ្រទ្រង់ជំរុញដល់សេដ្ឋកិច្ចជាតិមានកំណើន ប៉ុន្តែលោកស្រី Jyotsana Varma បានព្រមានថា កម្ពុជាក៏ប្រឈមនឹងហានិភ័យដែលអាចធ្វើឱ្យប្រែប្រួលទស្សនវិស័យផងដែរ។ បើតាមនាយិកាប្រចាំកម្ពុជារបស់ADBរូបនេះ ហានិភ័យដែលអាចរាំងស្ទះដល់កំណើនសេដ្ឋកិច្ចកម្ពុជា រួមមាន៖ កំណើនខ្សោយនៅសហរដ្ឋអាម៉េរិក និងអឺរ៉ុប, កម្រិតខ្ពស់នៃបំណុលឯកជន, កំណើនតិចជាងការរំពឹងទុកនៃការមកដល់នៃភ្ញៀវទេសចរ និងការវិនិយោគផ្ទាល់ពីបរទេស ពីប្រទេសចិន, តម្លៃថាមពលខ្ពស់ និងការប្រែប្រួលអាកាសដែលប៉ះពាល់ដល់ផលិតភាពកសិកម្មកម្ពុជា៕