ជាតិ
យ៉ានតាមដងផ្លូវ
រថយន្តធុនធ្ងន់ អាយុ ៤០ ដល់៥០ឆ្នាំ ប្រមាណ១០គ្រឿង ត្រូវបានទុកចោលនៅឃ្លាំងមួយនៅឃុំផ្អាវ
×
ដោយ៖ យ៉ាន
កំពង់ចាម៖ នៅគីឡូម៉ែត្រលេខ៦៤ នៃផ្លូវជាតិលេខ៦ នៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម មានឃ្លាំងមួយ ដែលមានរថយន្ដធុនធ្ងន់បុរាណជិត១០គ្រឿង។ វាខូចច្រើនណាស់ ដែលជិះលែងកើតទាំងអស់។ សុទ្ធតែឡានធំពីចុងទសវត្សរ៍ឆ្នាំ១៩៧០ និងទសវត្សរ៍ឆ្នាំ១៩៨០។ ភាគច្រើនជារថយន្ដម៉ាកចិន 红岩 (ជាអក្សរឡាតាំង HONGYAN) ប្រភេទ CQ ម៉ូឌែល 3192BL381 ពណ៌លឿង ដែលមានអាយុកាល៤០ឆ្នាំហើយ។ ក៏មានឡាន 红岩 ប្រភេទដូចគ្នា ម៉ូឌែល 4190SWQ35 ១គ្រឿងដែរ។ វាជារថយន្ដធំដើម្បីអូសសណ្ដោងកុងតឺន័រ ខណៈម៉ូឌែល 3192BL381 មានបែននៅក្រោយ ដែលអាចលើកបាន។
ព័ត៌មានលម្អិតសូមអញ្ជើញទស្សនាវីដេអូខាងក្រោមនេះ៖
ឆ្នាំ១៩៦៥ រដ្ឋភិបាលចិនបង្កើតគម្រោងផលិតរថយន្ដមួយហៅ ស៊ីឈួន តាមឈ្នោះខេត្តស៊ីឈួន ដែលស្ថិតនៅកណ្ដាលប្រទេសចិន។ គោលបំណងគឺផលិតឡានធុនធ្ងន់ សម្រាប់យោធា។ នេះជាដើមកំណើតនៃក្រុមហ៊ុនស្ថាប័នរដ្ឋ 红岩 ។ តាមពិត 红岩 គឺជាឈ្មោះភូមិវិទ្យា។ គឺជាឈ្មោះទន្លេមួយ និងទីក្រុងមួយ ស្ថិតនៅក្នុងតំបន់តែមួយ។ ចាប់ពីឆ្នាំ១៩៦៦ ត្រូវចាប់ផ្ដើមផលិតប្រភេទឡានដំបូង ចម្លងតាមរថយន្ដបារាំងម៉ាក BERLIET ។
ដើមឆ្នាំ១៩៨០ រដ្ឋាភិបាលចិនចុះកិច្ចសន្យា ជាមួយក្រុមហ៊ុនអូទ្រីស STEYR ដែលក៏ផលិតឡានធំដែរ។ មុនដំបូង 红岩 ផលិតរថយន្ដធុនធ្ងន់ STEYR ប្រភេទ 91 ក្រោមឈ្មោះ 红岩 CQ. STEYR 91 ត្រូវបានច្នៃប្រឌិតឆ្នាំ១៩៧៨។ 红岩 CQ3192BL381 និង 红岩 CQ4190SWQ35 ជាម៉ូឌែល២ ក្នុងចំណោមម៉ូឌែលជាច្រើនណាស់ ដែលត្រូវបានផលិត ទូទាំងប្រទេសចិន ក្នុងរោងចក្ររាប់រយកន្លែង! ប្រភេទឡាននេះ មានលេខកូដក្រុមហ៊ុនស្មុគស្មាញ ដោយសារមានម៉ូឌែលច្រើនមុខណាស់ ដែលផ្សេងពីគ្នាបន្តិច។ ក្រោយក្បាល ដែលជាអក្សរគ្រឹះ CQ មានលេខ៤តួ ដែលតំណាងឱ្យសាស៊ី (ម៉ូឌែល)។ ក្រោយលេខ៤តួ មានអក្សរ ដែលតំណាងឱ្យទ្រង់ទ្រាយ (ស៊េរី)។ ហើយក្រោយអក្សរនោះ មានកន្ទុយទៀត ដែលជាលេខតំណាងឱ្យឧបករណ៍បន្ថែម។
គម្រោងរដ្ឋនេះបានជោគជ័យ។ មិនមានការនាំចេញទៅក្រៅប្រទេស ក៏ប៉ុន្តែត្រូវលក់ក្រុមសម្ព័ន្ធទៅឱ្យស្ថាប័នឯកជនវិញ ដោយបែងចែកជាក្រុមហ៊ុនផ្សេងៗ នាឆ្នាំ១៩៨៥។ យ៉ាងណាក៏ដោយ ក្រុមហ៊ុន CNHTC ក៏ដោយ ក្រុមហ៊ុន SHAANXI ក៏ដោយ និងក្រុមហ៊ុន CHONGQING HONGYAN AUTOMOBILE ក៏ដោយ ក៏បន្តផលិតរថយន្ដធុនធ្ងន់ច្នៃប្រឌិតដោយក្រុមហ៊ុន STEYR ទៅទៀត។ រហូតដល់ពេលបច្ចុប្បន្ននេះ ក៏គេនៅតែផលិតឡានធំប្រភេទនេះបន្ត ដោយមានឈ្មោះផ្សេង ! វាទំនើបជាង ក៏ប៉ុន្តែគេប្រើសាស៊ីដដែល ដើម្បីផលិតរថយន្ដបែន និងរថយន្ដអូសសណ្ដោងកុងតឺន័រ។
ឆ្នាំ២០០៦ ក្រុមហ៊ុនឡានធំអ៊ីតាលី IVECO ទិញភាគហ៊ុនរបស់ 红岩 ៥០% ដើម្បីផលិតរថយន្ដធុនធ្ងន់អូសសណ្ដោងកុងតឺន័រ IVECO ក្រោមម៉ាក 红岩 សម្រាប់ទីផ្សារចិន៕
Tag:
រថយន្ត
យានយន្ត
ឡានបុរាណ
រថយន្តបុរាណ
© រក្សាសិទ្ធិដោយ thmeythmey.com