ក្រសួងកសិកម្ម បានណែនាំឱ្យកសិករ ត្រូវត្រៀមបង្ការ និងឆ្លើយតបចំពោះកិច្ចការដាំដុះស្រូវរបស់ខ្លួនក្នុងឆ្នាំ២០២៣នេះ ដោយការលើកទប់ និងថែទាំភ្លឺស្រែឱ្យបានល្អ ដើម្បីទឹកទុក ព្រមទាំងរៀបចំម៉ាស៊ីនបូមទឹកសម្រាប់បូមទឹកសង្គ្រោះនៅពេលចាំបាច់។ ការណែនាំនេះ គឺបន្ទាប់ពីក្រសួងធនធានបានព្យាករណ៍ថា រដូវវស្សាឆ្នាំ២០២៣ នឹងចូលមកដល់យឺត ពោលគឺទាល់តែសប្តាហ៍ទី២នៃខែឧសភា ជាមួយនឹងបរិមាណទឹកភ្លៀងពីតិចទៅមធ្យម ។ ទន្ទឹមនឹងនេះ កូនរដូវប្រាំង ដែលអាចកើតឡើង ក៏អូសបន្លាយចាប់ពីដើមខែកក្កដា រហូតដល់ខែដើមខែស៊ីហា។ សម្រាប់ក្រសួងកសិកម្ម ស្ថានភាពនេះ អាចបង្កផលប៉ះពាល់ដល់ផលិកម្មដំណាំកសិកម្ម។
ក្រៅពីការណែនាំឱ្យត្រៀមទឹកទុកសម្រាប់ប្រើប្រាស់ពេលចាំបាច់ហើយនោះ ក្រសួងកសិកម្ម តាមរយៈសេចក្តីប្រកាសព័ត៌មានចុះថ្ងៃទី២៦ ខែមេសានេះ ក៏ប្រាប់ឱ្យកសិករមិនគួរប្រថុយប្រថានដាំដុះ ស្រូវដើមរដូវវស្សា(ប្រភេទពូជស្រូវស្រាល) ដោយពឹងលើប្រភពទឹកតិចតួចនោះដែរ ព្រោះអាចប្រឈមនឹងការខូចខាតដោយសាររាំងស្ងួត។
សម្រាប់ប្រជាកសិករដែលនៅតំបន់ដែលមានប្រភពទឹកគ្រប់គ្រាន់ កសិករ គួរប្រញាប់ប្រញាល់ដាំដុះនៅចុងខែមេសា ឬដើមខែឧសភានេះ ដើម្បីអាចប្រមូលផលស្រូវនៅចុងខែកក្កដា ឬខែសីហា។ នេះបើតាមក្រសួងកសិកម្ម ដែលបានបន្តទៀតថា សម្រាប់ដាំដុះស្រូវអាស្រ័យទឹកភ្លៀង កសិករ គួររូតរះភ្ជួរដាស់ដី ដើម្បីត្រៀមដាំដុះក្នុងវខែមិថុនា ឬខែកក្កដា ដោយប្រើប្រាស់ប្រភេទពូជស្រូវកណ្តាលប្រាកន់រដូវ ដូចជា ពូជស្រូវផ្ការំដល និងប្រភេទពូជស្រូវផ្សេងៗទៀត ដែលនឹងត្រូវមូលផលក្នុងខែវិច្ឆិកា។
ចំពោះការដាំដុះដំណាំបន្លែវិញ ក្រសួង លើកទឹកចិត្តកសិករឱ្យប្រើប្រាស់ប្រព័ន្ធស្រោចស្រពសន្សំសំចៃទឹក ប្រក់សំណាញ់ ដើម្បីទប់កម្តៅ និងប្រើសារធាតុគម្របដីពីចំបើង ឬកាកសំណល់ដំណាំស្ងួត ឬគម្របប្លាស្ទិក ដើម្បីរក្សាសំណើបដីឱ្យបានយូរ។ ចំណែកកសិករដែលស្ថិតនៅតំបន់ឆ្ងាយពីប្រភពទឹកដូចជាទន្លេ ស្ទឹង បឹង ឬអាងទឹក ត្រូវត្រៀមលក្ខណៈរក្សាទឹកទុកឱ្យបានច្រើន នៅក្នុងត្រពាំង ឬអាងស្តុកទឹកតៅតាមគ្រួសារ ឬសហគមន៍ សម្រាប់ទុកស្រោចស្រពក្នុងពេលរាំងស្ងួត។
ក្រសួងកសិកម្ម ក៏បានបញ្ជាទៅមន្ទីរកសិកម្ម រុក្ខាប្រមាញ់ និងនេសាទ រាជធានី-ខេត្ត និងអាជ្ញាធរមូលដ្ឋាន ឱ្យសហការជាមួយអង្គភាពជំនាញ ចុះត្រួតពិនិត្យប្រភពទឹក វាយតម្លៃផ្ទៃដីដាំដុះ ដែលអាចមានលទ្ធភាពស្រោចស្រព និងសម្របសម្រួលបែងចែកការប្រើប្រាស់ទឹក ព្រមទាំងការផ្តល់បច្ចេកទេសផលិតកម្មដំណាំតាមបែបទំនើបបន្ស៊ាំនឹងការប្រែប្រួលអាកាសធាតុ។
ចំពោះអនុវិស័យជលផលវិញ ក្រសួងបានប្រាប់ដល់អាជ្ញាធរ ឱ្យតាមដានកម្ពស់ទឹក និងស្ថានភាពត្រីមេពូជនៅតាមកន្លែងអភិរក្សជលផល ព្រមទាំងត្រៀមប្រភពទឹក សម្រាប់បូមចូល ក្នុងករណីរីងរាក់ខ្លាំង ឬមានត្រីពុលងាប់ ព្រោះធាតុអាកាសនៅចន្លោះខែមេសា ដល់ខែមិថុនា មានសភាពក្តៅខ្លាំង ជាហេតុធ្វើឱ្យទឹកក្នុងស្រះរាក់។ ទឹកក្តៅខ្លាំង អាចបណ្តាលឱ្យត្រីក្នុងស្រះងាយងាប់ដោយសារពុលទឹក ខ្វះអុកស៊ីសែន ដែលទាមទារឱ្យមានការបញ្ចូលទឹកបន្ថែម ឬធ្វើទឹកក្នុងស្រះឱ្យមានចលនា ដើម្បីបង្កើនអុកស៊ីសែន។
ភាពរាំងស្ងួតនេះ ក៏អាចបង្កផ្តល់ប៉ះពាល់ដល់សុខភាពសត្វ និងផលិតកម្មសត្វដែរ។ ជុំវិញរឿងនេះ ក្រសួងបានណែនាំឱ្យយកចិត្តទុកដាក់ថែទាំងសត្វឱ្យបានល្អ ដោយផ្តល់ទីជម្រក ទឹក និងចំណី ព្រមទាំងចាក់វ៉ាក់សាំងឱ្យបានគ្រប់គ្រាន់ដល់សត្វ ខណៈធាតុអាកាសក្តៅ នឹង បណ្តាលឱ្យសត្វខ្លះខ្វះចំណី និងទឹក ភាពធន់នឹងជំងឺថយចុះ។ ចំណែកការឆ្លងជំងឺមានហានិភ័យខ្ពស់ ជាពិសេសបក្សី។
ក្រៅពីណែនាំដល់អ្នកពាក់ព័ន្ធ ក្រសួងកសិកម្មក៏បានផ្តល់លេខទំនាក់ទំនងរបស់មន្ត្រីជំនាញផងដែរ ដើម្បីរាយការណ៍ប្រសិនបើមានករណីខាងលើនេះ កើតឡើងនៅតំបន់របស់ខ្លួន៕