លោក គួច ចំរើន បានរៀបរាប់ថា ក្នុងចំណោមអគារជាង ៦០០កន្លែង ដែលបានបញ្ចប់ការសាងសង់ មានអគារប្រមាណ ៤០០ បានបន្តអាជីវកម្ម និង២០០កន្លែងទៀត មិនបន្តអាជីវកម្ម។ 
 

ជុំវិញសំណង់អគារនៅខេត្តព្រះសីហនុ ដែលកំពុងមានបញ្ហាប្រឈមនោះរដ្ឋាភិបាល បានបង្កើតគោលនយោបាយអនុគ្រោះលើកិច្ចការមួយចំនួន ដើម្បីគាំទ្រដល់បណ្ដាសំណង់អគារទាំងអស់អាចមានលទ្ធភាពក្នុងការវិនិយោគ ការសាងសង់ និងអាចដំណើរការសាងសង់។

 

លោក គួច ចំរើន បានបន្តថា គោលនយោបាយរបស់រដ្ឋាភិបាល ភាគច្រើនគឺការអនុគ្រោះពន្ធទៅលើផ្នែកនីមួយៗ ដើម្បីធ្វើយ៉ាងណាឱ្យក្រុមហ៊ុនវិនិយោគមានលទ្ធភាពបន្តការសាងសង់។ បន្ថែមពីនេះទៀត ក៏មានការសម្របសម្រួល និងការគាំទ្រផ្នែកច្បាប់ផងដែរ។
 

អភិបាលខេត្តរូបនេះ បានបញ្ជាក់ ចំពោះការសម្របសម្រួលផ្នែកច្បាប់គឺរដ្ឋាភិបាល នឹងលើកទឹកចិត្តឱ្យសម្របសម្រួលក្រៅប្រព័ន្ធតុលាច្រើនជាងក្នុងការដោះស្រាយបញ្ហាប្រឈមនៃអគារជាប់គាំងទាំងនោះ។ 

 

ដើម្បីដោះស្រាយទំនាស់រវាងគ្រប់ភាគីម្ចាស់សំណង់ដែលបានជាប់គាំងទាំងអស់នោះរដ្ឋាភិបាល បានផ្ដល់យន្តការគាំទ្រគូភាគីចូលមកជជែក និងសម្របសម្រួលគ្នាបន្តការសាងសង់អគារនោះបន្តទៅមុខទៀត។ លោក គួច ចំរើន បានបញ្ជាក់ថា៖ «បើសួរខ្ញុំពេលណាបញ្ចប់ខ្ញុំមិនអាចឆ្លើយបានទេ ព្រោះរឿងនេះជាទំនាស់ដែលយើងត្រូវតែបន្តធ្វើការដោះស្រាយទៅតាមស្ថានភាពជាក់ស្ដែងរបស់ម្ចាស់អគារបើគេមិនមករកយើង យើងមិនអាចទៅរកគេទេ ព្រោះម្ចាស់អគារនៅក្រៅប្រទេស»៕