កំពុងផែស្វយ័តព្រះសីហនុ មានតួនាតីយ៉ាងសំខាន់ក្នុងការចូលរួមគាំទ្រលើការរីកចម្រើន និងការអភិវឌ្ឍប្រទេសជាតិ។ កំពង់ផែនេះ បានប្រមូលចំណូលចូលជាតិកើនឡើងគួរឱ្យគត់សម្គាល់ពីមួយឆ្នាំទៅមួយឆ្នាំ។ សម្ដេច ហ៊ុន សែន នាយករដ្ឋមន្រ្តីនសកម្ពុជា បានថ្លែងបែបនេះ នៅក្នុងពិធីបើកការដ្ឋានសាងសង់ចំណតផែ​កុងតឺន័រថ្មី ​នៅ​កំពង់ផែស្វយ័តក្រុងព្រះសីហនុ នៅថ្ងៃទី ១ ខែឧសភា ឆ្នាំ២០២៣។
 

សម្ដេច ហ៊ុន សែន បានបញ្ជាក់ថា នៅឆ្នាំ២០២២ បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុ មានចំនួន​ ៧លានតោន ដែលកើនឡើង ០,១៨ភាគរយ ហើយចំណូលសរុបមានចំនួន ៣៤៤​ប៊ី​លានរៀល (ប្រមាណ ៨៤លានដុល្លារអាមេរិក) កើនឡើង ០,៤១ភាគរយ បើធៀបនឹងឆ្នាំ២០២១។
  

 

ការដ្ឋានសាងសង់កំពង់ផែកុងតឺន័រ និងពង្រីក នៅកំពង់ផែស្វយ័តក្រុងព្រះសីហនុនេះ គឺទី១. រដ្ឋាភិបាល នឹងកែសម្រួលកំពង់ផែដឹកទំនិញរាយ ទៅជាចំណតផែកុងតឺន័រ ដែលមានប្រវែង ២៥៣ម៉ែត្រ ដើម្បីបង្កើនសមត្ថភាពកំពង់ផែ ២៥០ ០០០TU បន្ថែមទៀត ដែលប្រើពេលសាងសង់ ១៨ខែ។ ទី២. ការបើកការដ្ឋានសាងសង់ចំណតផែកុងតឺន័រថ្មី-ជំហានទី១ ដែលមានជម្រៅទឹក ១៤,៥ម៉ែត្រ មានសមត្ថិភាពអាចឱ្យនាវាដឹកជញ្ជូន​នៅក្នុងតំបន់​អាស៊ីប៉ា​ស៊ី​ហ្វិក ទៅមកកំពង់ផែស្វយ័តក្រុងព្រះសីហនុ។ គម្រោងនេះ នឹងប្រើពេលសាងសង់ ៣៦ខែ គ្រោងបញ្ចប់នៅឆ្នាំ២០២៦។ 
 

ទី៣ ការបើកការដ្ឋានសាងសង់ចំណតផែកុងតឺន័រថ្មី-ជំហានទី២ ដែលមានជម្រៅទឹក ១៦,៥ម៉ែត្រ ដែលអាចអនុញ្ញាតឱ្យនាវាអាស៊ីប៉ាស៊ីហ្វិកនៅសមុទ្រឥណ្ឌា អាចចុះចតនៅកំពង់ផែស្វយ័តក្រុងព្រះសីហនុ ដែលអាចបង្កើនសមត្ថភាពផែបាន ៥៧០,០០០TEUថែមទៀត។ គម្រោងនេះ នឹងប្រើពេលសាងសង់ ៣៦ខែ គ្រោងបញ្ចប់នៅឆ្នាំ២០២៨។ 
 

ទី៤ ការបើកការដ្ឋានសាងសង់ចំណតផែកុងតឺន័រថ្មី-ជំហានទី៣ មានជម្រៅទឹក ១៧,៥ម៉ែត្រ ដែលអាចអនុញ្ញាតឱ្យនាវាធំៗ ដែលមានទម្ងន់រហូតដល់ ១៦ម៉ឺនតោន អាចចូលចតនៅកំពង់ផែក្រុងស្វយ័តព្រះសីហនុនោះ។ ចំពោះនាវាទាំងនោះ អាចធ្វើដំណើរពីកំពង់ផែកម្ពុជា ទៅមកអាមេរិក និងតំបន់អឺរ៉ុប ដោយមិនចាំបាច់ផ្ទុកផ្ទេរនៅកន្លែងផ្សេងទៀតនោះទេ។
គម្រោងនេះ នឹងប្រើប្រាស់​ពេលសាងសង់ចំនួន ៤២ខែ គ្រោងនឹងបញ្ចប់នៅឆ្នាំ២០២៩។ នេះបើតាមលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។
 

លោក ស៊ុន ចាន់ថុល បានបញ្ជាក់ថា នៅឆ្នាំ២០៣០ កំពង់ផែស្វយ័តក្រុងព្រះសីហនុ នឹងមានសមត្ថភាព ៤ដង ដែលលើសពីពេលបច្ចុប្បន្ន ព្រោះកំពង់ផែនេះ កំពុងដើរតួនាទីយ៉ាងសំខាន់ ក្នុងការធ្វើពាណិជ្ជកម្មទាំងក្នុង និងក្រៅប្រទេសប្រមាណ ៦០ភាគរយ សម្រាប់ការនាំចេញ-ចូលទំនិញ។
  

 

«បើគ្មានកំពង់ផែ មិនដឹងដឹកជញ្ជូនទំនិញតាមណាទេ មានតែដឹកតាមយន្តហោះ តែមិនអាចដឹកតាមយន្តហោះបានទេថ្លៃណាស់។ នៅទូទាំងពិភពលោកគេដឹកទំនិញតាមសមុទ្រ ដូច្នេះកំពង់ផែជាដង្ហើម ជាកន្លែងផ្លាស់ប្ដូរទំនិញពីប្រទេសមួយទៅប្រទេសមួយទៀតក្នុងពិភពលោក»។ នេះបើតាមការបញ្ជាក់របស់ លោក ស៊ុន ចាន់ថុល។
 

គម្រោងដែលរដ្ឋាភិបាលបានរៀបរាប់ខាងលើនេះ នឹងត្រូវចំណាយថវិកាជិត ១ពាន់លានដុល្លារអាម៉េរិក ក្នុងនោះថវិកាជប៉ុនប្រមាណ ៧០០លានដុល្លារ ។ ក្រៅពីនោះជាថវិកាបដិភាគរបស់រដ្ឋាភិបាល និងជាចំណូលរបស់កំពង់ផែផ្ទាល់៕