ជាប្រវត្តិដ៏អស្ចារ្យសម្រាប់កីឡាសូហ្វតេន្នីសកម្ពុជាក្នុងព្រឹត្តិការណ៍កីឡាស៊ីហ្គេមលើកទី៣២នេះ ដោយក្រុមជម្រើសជាតិបានឡើងប៉ះគ្នានៅវគ្គផ្តាច់ព្រ័ត្រក្នុងការដណ្តើមមេដាយមាស ដែលរៀបចំនៅទីលានពហុកីឡដ្ឋានជាតិអូឡាំពិក នាថ្ងៃទី៦ ខែឧសភា។

 

កីឡាការិនី ឃុន ចន្ទរ៉ូសិកា និងកីឡាករ សំ ចាន់កាប៊ី ទទួលបានមេដាយមាស ក្រោយយកឈ្នះមិត្តរួមជាតិខ្លួន គឺកីឡាការិនី ហូ ស្រីណុច និងកីឡាករ សាយ សុចិត្រា នៅវគ្គផ្តាច់ព្រ័ត្រ។

 

នៅការប្រកួតវគ្គជម្រុះ ចន្ទរ៉ូសិកា និង ចាន់កាប៊ី ឈ្នះក្រុមឡាវ Anandone Khamphoumy និង Pankeo Teso ក្នុងលទ្ធផល ៥-៣, ឈ្នះក្រុមទីម័រខាងកើត Albertina Castro Doutel de Sousa និង Aniceto Cardoso Alves ក្នុងលទ្ធផល ៥-០, ឈ្នះស្រីណុច និងសុចិត្រា ក្នុងលទ្ធផល ៥-២។

 

រីឯស្រីណុច និងសុចិត្រា បានយកឈ្នះក្រុមឡាវ ៥-១, ឈ្នះក្រុមទីម័រខាងកើត មុននឹងចាញ់មិត្តរួមជាតិរបស់ខ្លួនដដែលនៅវគ្គផ្តាច់ព្រ័ត្រ៕