តាមរយៈសារសំឡេងជាង៨នាទី នាថ្ងៃទី១៣ ឧសភានេះ ប្រមុខរដ្ឋាភិបាល បានថ្លែងថា៖«បើទោះជាចុះឈ្មោះបាន ឬមិនបាន សូមបងប្អូន(ប្រជាពលរដ្ឋ) កុំចាញ់បោក មកជាប់គុក ឬស្លាប់ជំនួសឱ្យមេដឹកនាំ។ ខ្ញុំសូមអំពាវនាវពលរដ្ឋកុំចូលរួមសកម្មភាពណាមួយ ជាមួយគណបក្សភ្លើងទៀនឱ្យសោះ»។
 

សម្ដេច ហ៊ុន សែន ក៏បានបញ្ជាឱ្យអាជ្ញាធរគ្រប់លំដាប់ថ្នាក់ កុំឱ្យមានការប្រមូលផ្ដុំគ្រប់ភាពណាមួយ ដែលនាំឱ្យបង្កបញ្ហាចលាចលក្នុងសង្គម ដែលប៉ះពាល់សណ្ដាប់ធ្នាប់សាធារណៈ ស្របពេលដែលកម្ពុជា កំពុងធ្វើជាម្ចាស់ផ្ទះ ស៊ីហ្គេមលើកទី៣២ឡើយ។ «អាជ្ញាធរគ្រប់លំដាប់ថ្នាក់ ពិសេសកម្លាំងប្រដាប់អាវុធ ដែលមានការទទួលខុសត្រូវ ត្រូវមានការត្រៀមបម្រុងខ្លួន ដើម្បីចាប់យកក្បាលម៉ាស៊ីនទាំងអស់ ទាំងថ្នាក់ដឹកនាំជាតិ និងថ្នាក់ក្រោមជាតិ ដែលហ៊ានចេញមុខប្រឆាំង កៀបសង្កត់សណ្ដាប់ធ្នាប់សាធារណៈ ដែលកំពុងប្រព្រឹត្តទៅ។ យើងមិនអាចអត់ឱនឱ្យបាន ជាមួយនឹងទង្វើគ្មានការទទួលខុសត្រូវរបស់មេដឹកនាំគណបក្សភ្លើងទៀនបានទេ»។ នេះជាសាររបស់សម្ដេច ហ៊ុន សែន ព្រមានថ្នាក់ដឹកនាំបក្សភ្លើងទៀន ដែលហ៊ានធ្វើសកម្មភាពបំផ្លាញមុខមាត់កម្ពុជា ដែលកំពុងរៀបចំធ្វើជាម្ចាស់ផ្ទះស៊ីហ្គេម ដោយរលូន និងល្អប្រសើរនេះ។