ការព្យាករអំពីកំណើននៃការផ្គត់ផ្គង់បរិមាណអង្ករត្រូវបានត្រឡប់មកវិញ បន្ទាប់ពីទិន្នផលស្រូវក្នុងឆ្នាំ ២០២២ បានធ្លាក់ចុះជាលើកដំបូង ក្នុងរយៈពេល ៧ឆ្នាំ។ ទិន្នផលស្រូវនារដូវច្រូតកាត់ដែលទើបនឹងប្រមូលផលថ្មីៗនេះនៅឥណ្ឌា និងថៃ ដែលជាប្រទេសនាំចេញអង្កដ៏ធំរបស់ពិភពលោក បានកើនឡើងខ្លាំងបើធៀបឆ្នាំមុន។ 

 

លោក Shirley Mustafa សេដ្ឋវិទូនៅអង្គការស្បៀងអាហារ និងកសិកម្មនៃអង្គការសហប្រជាជាតិ (FAO) បាននិយាយថា អ្នកផលិតធំៗនៅឥណ្ឌា ប៉ាគីស្ថាន និងថៃ នឹងចាប់ផ្តើមដាំដំណាំសំខាន់ៗរបស់ពួកគេនៅខែឧសភា និងមិថុនា។ តំបន់ទាំងនោះដែលភាគច្រើនដាំដុះស្រូវបានកើនឡើង ស្របពេលដែលតម្លៃស្រូវ និងការទទួលបានជីគ្រប់គ្រាន់អាចទ្រទ្រង់ការពង្រីកទិន្នផល។

 

សង្រ្គាមនៅអ៊ុយក្រែន, ការរឹតបន្តឹងការនាំចេញរបស់ឥណ្ឌាកាលពីឆ្នាំមុន រួមជាមួយនឹងការធ្លាក់ចុះនៃទិន្នផលសកលបន្ទាប់ពីរលកកម្តៅនៅចិន និងទឹកជំនន់នៅប៉ាគីស្ថាន បានធ្វើឱ្យតម្លៃអាហារូបត្ថម្ភកើនឡើង និងការព្រួយបារម្ភកាន់តែខ្លាំងអំពីអតិផរណា។

 

ទោះជាយ៉ាងណាក៏ដោយ តម្លៃអង្ករបានធ្លាក់ចុះក្នុងរយៈពេលប៉ុន្មានសប្តាហ៍ថ្មីៗនេះ ដោយអង្ករដែលពេញនិយមនៅឥណ្ឌាបានធ្លាក់ថ្លៃ ៥ភាគរយ ដែលទាបជាងកម្រិតខ្ពស់បំផុតក្នុងរយៈពេលពីរឆ្នាំដែលបានកត់ត្រាក្នុងឆ្នាំ ២០២៣ ។

 

ផលិតកម្មស្រូវរដូវរងានៅឥណ្ឌាបានកើនឡើងដល់ ២២,៨លានតោនពី ១៨,៥លានតោនកាលពីឆ្នាំមុន ដោយសារទឹកភ្លៀងលើសពីមធ្យមក្នុងខែកញ្ញា និងខែតុលាបានជំរុញឱ្យកសិករពង្រីកផលិតកម្ម។ សន្ទុះនៃការងើបឡើងវិញបានទូទាត់ការធ្លាក់ចុះនៃដំណាំរដូវក្តៅ។

 

តាមទិន្នន័យរបស់អង្គការ FAO ផលិតកម្មស្រូវក្រៅរដូវនៅថៃក្នុងឆ្នាំនេះ ត្រូវបានគេរំពឹងថានឹងកើនឡើងដល់៥,១លានតោន ពោលគឺកើនឡើង២៤ភាគរយធៀបនឹងឆ្នាំមុន ។

 

ក្រុមប្រឹក្សាធញ្ញជាតិអន្តរជាតិ (IGC) បានលើកឡើងថា នៅទូទាំងពិភពលោក ផ្ទៃដីស្រូវអង្ករ ត្រូវបានគេរំពឹងថានឹងកើនឡើងពី ១៦៣.៧៤លានហិចតាដល់ ១៦៥,៧លានហិចតាក្នុងឆ្នាំដាំដុះ ២០២៣-២០២៤ ជាមួយនឹងទំហំផលិតកម្ម កើនឡើងពី ៥០៩,៣០លានតោនដល់ ៥២១,៤៩លានតោន។

 

តម្លៃជីបានធ្លាក់ចុះនៅក្នុងត្រីមាសទី១ ឆ្នាំ២០២៣ ដោយសារមានការផ្គត់ផ្គង់ពីប្រទេសបេឡារុសដែលជាអ្នកនាំចេញធំបំផុតទី៣ នៃប៉ូតាស្យូម (សមាសធាតុប៉ូតាស្យូម វត្ថុធាតុដើមសំខាន់ៗសម្រាប់ផលិតជី) បានបន្តឡើងវិញ ។

 

ទោះជាយ៉ាងណាក៏ដោយអាកាសធាតុនៅតែជាកត្តាសំខាន់សម្រាប់ផលិតកម្មស្រូវនៅអាស៊ី។ អ្នកឧតុនិយមខ្លះព្យាករថា បាតុភូត El Nino នឹងបង្កគ្រោះរាំងស្ងួតសម្រាប់តំបន់អាស៊ីភាគច្រើន៕