គណបក្សប្រជាធិបតេយ្យមូលដ្ឋាន ដែលមានលោក យ៉េង វីរៈ ជាប្រធាន ក៏ចេញសេចក្តីថ្លែងការណ៍មួយនឹងគេដែរ ជុំវិញការសម្រេចរបស់គណៈកម្មាធិការជាតិរៀបចំបោះឆ្នោត (គ.ជ.ប) ដែលបដិសេធមិនឲ្យគណបក្សភ្លើងទៀន ចូលរួមប្រកួតប្រជែងក្នុងការបោះឆ្នោតជាតិនាពេលខាងមុខ។ ប៉ុន្តែ សេចក្តីថ្លែងការណ៍របស់គណបក្សប្រជាធិបតេយ្យមូលដ្ឋាន មានគោលជំហរខុសពីសេចក្តីសេចក្តីការណ៍របស់គណបក្សនានា។ ខុសគ្នានៅត្រង់ថា គណបក្សប្រជាធិបតេយ្យមូលដ្ឋាន បង្ហាញសោកស្តាយ ឯគណបក្សផ្សេង បង្ហាញការគាំទ្រដល់គ.ជ.ប។  
 

គណបក្សប្រជាធិបតេយ្យមូលដ្ឋាន  អះអាងថា ខ្លួន ពិតជាសោកស្តាយណាស់ ដែលគ.ជ.ប បដិសេធមិនទទួលពាក្យសុំចូលប្រកួតរបស់គណបក្សភ្លើងទៀន។ គណបក្សប្រជាធិបតេយ្យមូលដ្ឋាន បង្ហាញការយល់ឃើញដូច្នេះថា៖«ការបដិសេធចុះបញ្ជីគណបក្សភ្លើងទៀន បានជះឥទ្ធិពលអវិជ្ជមានដល់ដំណើរការបោះឆ្នោត ដែលមានលក្ខណៈសេរី និងយុត្តិធម៌ ហើយផ្ទុយពីគោលការណ៍ប្រជាធិបតេយ្យសេរីពហុបក្សនៅព្រះរាជាណាចក្រកម្ពុជា»។ 
 

គ.ជ.ប សំអាងលើហេតុផលថា គណបក្សភ្លើងទៀន មិនមានប្រកាស (ដើម) ស្តីពីការចុះបញ្ជីគណបក្សនៅក្រសួងមហាផ្ទៃ ដែលមានបញ្ជាក់នីត្យានុកូលកម្មពីរដ្ឋបាលថ្នាក់ក្រោមជាតិ ទើបគ.ជ.ប បដិសេធមិនទទួលពាក្យសុំចូលប្រកួតរបស់គណបក្សនេះ។ 
 

គណបក្សប្រជាធិបតេយ្យមូលដ្ឋាន បង្ហាញការមើលឃើញរបស់ខ្លួនត្រង់កន្លែងនេះថា គណបក្សភ្លើងទៀន បានស្នើទៅក្រសួងមហាផ្ទៃ ដើម្បីសុំលិខិតគតិយុត្តិស្តីពីការចុះបញ្ជីគណបក្ស និងបានព្យាយាមបំពេញតាមលក្ខខណ្ឌ ដែលគ.ជ.ប តម្រូវផងដែរ។ គណបក្សប្រជាធិបតេយ្យមូលដ្ឋាន បន្ថែមថា លើសពីនេះ គណបក្សភ្លើងទៀន ទើបនឹងចូលរួមប្រកួតប្រជែងក្នុងការបោះឆ្នោតឃុំ-សង្កាត់ នៅខែមិថុនា ឆ្នាំ២០២២ និងការបោះឆ្នោតក្រុង-ស្រុក ដែលបង្កើតថ្មី នាខែមេសា ឆ្នាំ២០២៣នេះ ដោយមានអ្នកគាំទ្រជាច្រើនរួចមកហើយ។ 
 

មានគណបក្សទាំងអស់២០ ដែលបានដាក់ពាក្យទៅកាន់គ.ជ.ប ដើម្បីសុំចូលរួមប្រកួតប្រជែងការបោះឆ្នោតជាតិ នៅថ្ងៃទី២៣ ខែកក្កដា ឆ្នាំ២០២៣។ ក្នុងចំណោមគណបក្សទាំង២០នោះ មានតែគណបក្សភ្លើងទៀនប៉ុណ្ណោះ ដែលត្រូវគ.ជ.ប បដិសេធ។ បន្ទាប់មក បណ្តាគណបក្សដែលបានចុះឈ្មោះចូលប្រកួត ក៏នាំគ្នាចេញសេចក្តីថ្លែងការណ៍ម្នាក់មួយៗ ដើម្បីបង្ហាញការគាំទ្រដល់គ.ជ.ប។ 
 

គណបក្សយុវជនកម្ពុជា ដែលមានលោក ពេជ្រ ស្រស់ ជាប្រធាន បានសរសេរក្នុងសេចក្តីថ្លែងការណ៍ថា ការដែលគ.ជ.ប បដិសេធមិនទទួលពាក្យសុំចូលប្រកួតរបស់គណបក្សភ្លើងទៀន គឺឆ្លុះបញ្ចាំងពីការអនុវត្តគោលការណ៍ច្បាប់ដោយស្មើភាពចំពោះគណបក្សគ្រប់និន្នាការ។ មិនត្រឹមតែប៉ុណ្ណឹងទេ គណបក្សយុវជនកម្ពុជា ថែមទាំងស្នើទៅក្រុមប្រឹក្សាធម្មនុញ្ញទៀត សុំឲ្យតម្កល់សេចក្តីសម្រេចរបស់គ.ជ.ប ទុកជាបានការ ក្នុងករណីគណបក្សភ្លើងទៀន ប្តឹងតវ៉ាទៅក្រុមប្រឹក្សាធម្មនុញ្ញ។ 
 

ថ្នាក់ដឹកនាំគណបក្សភ្លើងទៀន ប្រកាសក្នុងសន្និសីទកាសែត នៅព្រឹកថ្ងៃទី១៦ ខែឧសភា ឆ្នាំ២០២៣នេះ ថានឹងយកបណ្តឹងទៅដាក់នៅក្រុមប្រឹក្សាធម្មនុញ្ញឲ្យបានមុនថ្ងៃទី២០ ខែឧសភា ដើម្បីសុំជំទាស់នឹងគ.ជ.ប៕