តំបន់ខ្លះ បន្តធ្លាក់ភ្លៀងក្នុងកម្រិតតិច មួយសប្តាហ៍

ជាតិ

តំបន់ខ្លះ បន្តធ្លាក់ភ្លៀងក្នុងកម្រិតតិច មួយសប្តាហ៍

17, May 2023 , 7:59 am

រូបភាព

ដោយ៖ សែម ប្រាក់ដាវ

ភ្នំពេញ៖ ក្រសួងធនធានទឹក និងឧតុនិយមបានព្យាករថា កម្ពុជា នឹងរងឥទ្ធិពលជ្រលងសម្ពាធទាបពីប្រទេសឥណ្ឌា ដែលនាំមកនូវខ្យល់មូសុងកម្រិតខ្សោយ។ ស្ថានភាពបែបនេះ អាចធ្វើឱ្យខេត្តមួយចំនួន មានភ្លៀងធ្លាក់កម្រិតខ្សោយទៅមធ្យមមួយសប្ដាហ៍។

បើតាមក្រសួងធនធានទឹក បណ្ដាខេត្តនៅតំបន់វាលទំនាបកណ្ដាល សីតុណ្ហភាពអប្បបរមាពី ២៦-២៨អង្សាសេ និងសីតុណ្ហភាពអតិបរមាពី ៣៦-៣៨អង្សាសេ ។ កម្រិតអាកាសធាតុនៅភូមិសាស្ត្រនេះ នឹងអាចមានភ្លៀងធ្លាក់ពីខ្សោយទៅមធ្យម លាយឡំជាមួយផ្គរ រន្ទះ និងខ្យល់កន្រ្តាក់ ចាប់ពីថ្ងៃទី១៧-២៣ ឧសភា។

ដោយឡែកតំបន់ខ្ពង់រាបវិញ នឹងមានសីតុណ្ហភាពអប្បបរមាពី ២៤-២៦អង្សាសេ និងសីតុណ្ហភាពអតិបរមាពី ៣៥-៣៧អង្សាសេ ។ សម្រាប់តំបន់មាត់សមុទ្រ មានសីតុណ្ហភាពអប្បបរមាពី ២៣-២៥អង្សាសេ និងសីតុណ្ហភាពអតិបរមាពី ២៩-៣១អង្សាសេ។ តំបន់ទាំងនេះ អាចនឹងមានភ្លៀងធ្លាក់ពីកម្រិតខ្សោយ ហើយអាចមានភ្លៀងផ្គររន្ទះ និងខ្យល់កន្រ្តាក់ ពីខ្សោយទៅបង្គួរផងដែរ ។

ទាក់ទងនឹងស្ថានភាពអាកាសធាតុពីថ្ងៃទី២០ ដល់ថ្ងៃទី២៣ ខែឧសភា ឆ្នាំ២០២៣ដដែល ក្រសួងធនធានទឹក និងឧតុនិយម បានព្យាករថា នៅតំបន់សមុទ្រ នឹងមានភ្លៀងកើនឡើងក្នុងកម្រិតពីតិចទៅបង្គួរ លាយឡំទៅដោយផ្គរ រន្ទះ ខ្យល់ ខ្យល់កន្ទ្រាក់៕