ជាតិ
សង្គមជាតិ
×![]()
ដោយ: ប៉ូ សាគុន
ភ្នំពេញ៖ សួនអំណាន ជាកន្លែងដ៏ល្អមួយសម្រាប់សាធារណជន ដែលដើរទស្សនាក្នុងកម្មវិធីផ្សេងៗ ហត់ អាចឈប់សម្រាកជជែកគ្នាលេង ឬអានសៀវភៅបង្កើនចំណេះដឹង និងបង្កើតភាពសប្បាយរីករាយ។ នេះបើតាម លោក សុខ ឡាក់ សហស្ថាបនិកបណ្ណាល័យបញ្ញវន្ត។ ក្នុងបទសម្ភាសជាមួយ សារព័ត៌មានថ្មីៗ លោក សុខ ឡាក់ យល់ឃើញថាសួនអំណាន អាចជួយសាធារណជន ដែលមិនមានពេលទៅបណ្ណាល័យ ឬមិនមានពេលទៅបណ្ណាគារ និងមិនមានពេលទៅស្វែងរកសៀវភៅ ឱ្យចាប់ផ្ដើមមើលឃើញ ពីសកម្មភាពអានសៀវភៅ និងចំណាយពេលនៅជាមួយខ្លួនឯងកាន់តែច្រើន។
សម្រាប់ លោក សុខ ឡាក់ ការបង្កើតសួនអំណាន និងការបំផុសឱ្យមានសួនអំណាននៅក្នុងកម្មវិធីផ្សេងៗ ដូចជាកម្មវិធីតាំងពិព័រណ៍សៀវភៅកម្មវិធីតាំងពិព័រណ៍ផ្សេងៗមហោស្រពអក្សរសិល្ប៍ ឬមហោស្រព ផ្សេងៗ ឬនៅទីសាធារណៈ គឺជាចលនាជំរុញការអានដ៏សំខាន់។ លោកថា នេះគឺជាមធ្យោបាយរុញ សៀវភៅឱ្យទៅកៀកនឹងសាធារណជនគ្រប់លំដាប់ថ្នាក់។ បន្ថែមពីនោះ ការបង្កើតសួនអំណានកាន់តែ ច្រើន ត្រូវបានលោក សុខ ឡាក់ មើលឃើញថាជាគំរូភាពមួយបំផុសជាគំនិតថា នៅទីសាធារណៈ ក៏អាច បង្កើតជាកន្លែងអានសៀវភៅបានដែរ។
លោក សុខ ឡាក់ សហស្ថាបនិកបណ្ណាល័យបញ្ញវន្ត
សហស្ថាបនិករូបនេះ បានលើកឧទាហរណ៍ គ្រាដែលលោកបានទៅឃើញចរន្ត នៃការពង្រីកកន្លែងអានសៀវភៅនៅប្រទេសជឿនលឿនដូច្នេះ៖ «ខ្ញុំធ្លាប់ទៅសាំងហ្គាពួរ(សិង្ហបុរី) អ្វីដែលគួរឱ្យភ្ញាក់ផ្អើលនោះ គឺប្រទេសគេតូចទេ ប៉ុន្តែបណ្ណាល័យគេធំៗមែនទែន។ បណ្ណាល័យខ្លះ មានដល់១៤ជាន់។ ហើយសឹងតែយើងដើរ៤ ទៅ៥ ផ្លូវយើងឃើញមានបណ្ណាល័យមួយទៀត ដែលធ្វើឱ្យខ្ញុំគិតថា ម្ដេចក៏ប្រទេសគេអភិវឌ្ឍន៍ហើយ ប្រទេសគេសម្បូរអ្នកចេះដឹងហើយ ប៉ុន្តែនៅតែត្រូវការបណ្ណាល័យ ត្រូវការទីតាំងអានជាច្រើនទៀត?»។
បុរសសម្បុរស មុខកាត់កូនចៅចិនរូបនេះ អះអាងថាបណ្ណាល័យបញ្ញវន្ត បានមើលឃើញថា សួនអំណានដើរតួនាទីយ៉ាងសំខាន់ ដើម្បីបំផុសឱ្យសាធារណជនចាប់ផ្ដើមពង្រឹងខ្លួនឯង ដោយពួកគេមិនចាំបាច់ទៅបណ្ណាល័យឆ្ងាយៗ។ លោកថា ក្នុងដំណាក់កាលប្រទេសកម្ពុជា ជាប្រទេសកំពុងអភិវឌ្ឍន៍ សេដ្ឋកិច្ចកំពុងកើនឡើងក្នុងថ្ងៃអនាគតកម្ពុជា ត្រូវការធនធានមនុស្ស ដែលមានគុណភាពខ្លាំងក្លា។ ហើយអ្វីដែលរួមចំណែក ដើម្បីឆ្លើយតបនឹងតម្រូវការសេដ្ឋកិច្ចដ៏លឿននោះ គឺយុវជនត្រូវការអានសៀវភៅឱ្យបានច្រើន។
សកម្មភាព យុវជន រៀបចំសៀវភៅនៅបណ្ណាល័យបញ្ញវន្ត
«ប្រទេសដែលសម្បូរអ្នកចេះដឹង ឬប្រទេស ដែលគេចាប់ផ្ដើមឱ្យតម្លៃលើសៀវភៅ យើងឃើញថាតួនាទីបណ្ណាល័យ មានសារសំខាន់ណាស់។ បណ្ណារក្សនៅប្រទេសសាំងហ្គាពួរ (សិង្ហបុរី) គាត់ប្រាប់ថាគាត់ខ្វះគ្រូ។ ដូច្នេះគាត់ត្រូវការជំរុញសកម្មភាពបណ្ណាល័យ ឱ្យមានសកម្មភាពកាន់តែទូលំទូលាយ។ គ្រាន់តែការខ្វះគ្រូដែលមានគុណភាព ហេតុអ្វីត្រូវការជំរុញបណ្ណាល័យ? គាត់ប្រាប់ថានៅពេលណាដែលជំរុញបណ្ណាល័យ ធ្វើឱ្យសិស្ស មានការសិក្សាឯករាជ្យ»។ នេះជាការពន្យល់របស់លោក សុខ ឡាក់។
លោក សុខ ឡាក់ ថាសៀវភៅក៏ជាមធ្យោបាយកម្សាន្ត ដែលអាចស្រមៃដល់ទិដ្ឋភាព នៅក្រៅប្រទេសបាន ដោយមិនចាំបាច់ចំណាយប្រាក់ច្រើន ទៅទស្សនកិច្ចដល់ប្រទេសទាំងនោះឡើយ។ ពិសេសអ្នកដែលមានគោលបំណងសិក្សាអំពីចំណេះដឹងថ្មី សៀវភៅគឺជាមធ្យោបាយដ៏ល្អបំផុត៕
Tag:
អំណាន
គម្រោង
ការអប់រំ
© រក្សាសិទ្ធិដោយ thmeythmey.com
