មកទល់បច្ចុប្បន្នមានប្រជាពលរដ្ឋប្រមាណ​២,១លាននាក់ជាអតិថិជនរបស់វិស័យមីក្រូហិរញ្ញវត្ថុនៅកម្ពុជា។ ក្នុងនោះមានជាង១,២លាននាក់​ នឹងស្មើនឹង៦០ភាគរយនៃចំនួនសរុប ដែលជាអតិថិជនទទួលប្រាក់កម្ចីពីវិស័យមីក្រូហិរញ្ញវត្ថុ ដោយមិនមានទ្រព្យបញ្ចាំទេ។ ការផ្តល់កម្ចីក្រោមទំហំ៣០០០ដុល្លារ ឬលើសពីនេះតិចតួច ដោយគ្រឹះស្ថានមីក្រូហិរញ្ញវត្ថុនានានៅកម្ពុជា គឺមិនទាមទារឱ្យអ្នកខ្ចីមានទ្រព្យបញ្ចាំឡើយ។  
  

 

ឥណទានដែលគ្មានទ្រព្យបញ្ចាំទាំងនោះ បានដើរតួនាទីយ៉ាងសំខាន់ក្នុងការលើកកម្ពស់ប្រជាពលរដ្ឋ ដែលមានជីវភាពខ្សត់ខ្សោយ  និងជួយពលរដ្ឋឱ្យចៀសផុតពីបំណុលវ័ណ្ឌក ​តាមរយៈការយកកម្ចីក្រៅផ្លូវការ។ 
 

 

លើសពីនេះ ការផ្តល់ឥណទានដោយវិស័យមីក្រូហិរញ្ញវត្ថុនេះ គឺមានការការពារដោយច្បាប់ច្បាស់លាស់, មានអត្រាការប្រាក់សមរម្យ សម្រាប់ប្រជាពលរដ្ឋត្រឹម១,៥ភាគរយក្នុងមួយខែ ដើម្បីយកកម្ចីទាំងនោះទៅបង្កើនមុខរបរ, បង្កើនប្រាក់ចំណូលក្នុងគ្រួសារ ក៏ដូចជាការជួយកាត់បន្ថយភាពក្រីក្រ នៅសហគមន៍ និងតាមជនបទ។ ក្រៅតែពីតួនាទីជួយធ្វើឱ្យសង្គមប្រសើរឡើងនោះ កម្ចីឥតទ្រព្យបញ្ចាំនេះ ក៏ជួយជំរុញសេដ្ឋកិច្ចនៅតាមទីជនបទ ផងដែរ។  នេះជាការលើកឡើងរបស់អ្នកនាំពាក្យសមាគមមីក្រូហិរញ្ញវត្ថុកម្ពុជា។ 

 

លោក កាំង តុងងី បានអះអាងថា ពលរដ្ឋឱ្យតែមានមុខរបរ ឬអាជីវកម្មច្បាស់លាស់ និងប្រភពចំណូលត្រឹមត្រូវ គឺអាចស្នើសុំកម្ចី ពីមីក្រូហិរញ្ញវត្ថុដែលខ្លួនពេញចិត្តបានហើយ៕