សម្ដេច ហ៊ុន សែន ទទួលបានដំណឹងថា លោក សម រង្ស៊ី មានគម្រោងចូលទៅប្រទេសវៀតណាម ក្នុងនាមជាភ្ញៀវទេសចរ ដោយប្រើប្រាស់លិខិតឆ្លងដែនសញ្ជាតិបារាំង។ ក្រោយទទួលបានដំណឹងនេះ សម្ដេច ក៏ប្រាប់ទៅរដ្ឋាភិបាលវៀតណាម តាមរយៈអគ្គរដ្ឋទូតប្រចាំកម្ពុជា ឱ្យត្រៀមកម្លាំងចាប់មេដឹកនាំប្រឆាំងរូបនេះ។ 
 

ប្រមុខរដ្ឋាភិបាល បានផ្ដាំឯកអគ្គរដ្ឋទូតវៀតណាមប្រចាំកម្ពុជាដូច្នេះថា៖«ឯកឧត្តមអគ្គរដ្ឋទូត ជូនដំណឹងទៅ(រដ្ឋាភិបាលវៀតណាម)ហ្មងទៅ ។ គេ(សម រង្ស៊ី) មានផែនការចូលម៉ាឡេស៊ី តែម៉ាឡេស៊ីឱ្យចេញវិញ។ គេមានផែនការចូលថៃ គេមានផែនការចូលវៀតណាមទៀត តាមរយៈ Passport បារាំង ធ្វើជាភ្ញៀវទេសចរ ដើម្បីបង្កើតស្ថានភាពបែបនេះ។ ហើយបើសិនចូល(វៀតណាម) ខ្ញុំសូមស្នើចាប់មកឱ្យខ្ញុំ ព្រោះមានដីកាចាប់ខ្លួន»។
 

លោកនាយករដ្ឋមន្រ្តី បានបន្ថែមថា កម្ពុជា និងវៀតណាម មានទំនាក់ទំនងធ្វើបត្យាប័នជាមួយគ្នា ក្នុងការចាប់ខ្លួនអ្នកជាប់ទោស បញ្ជូនទៅវិញទៅមក។ សម្ដេច ហ៊ុន សែន បានសង្កត់ធ្ងន់ថា បើវៀតណាម មិនព្រមចាប់លោក សម រង្ស៊ី បញ្ចូនមកកម្ពុជាទេ នោះវៀតណាម នឹងមានបញ្ហាជាមួយកម្ពុជា។