ជាតិ
សេដ្ឋកិច្ច
ការទូទាត់ឆ្លងដែន ស្កេន QR Code រវាងកម្ពុជា-ថៃ សម្រេចបានទឹកប្រាក់ជាង ៣០០០លានរៀល លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី កំពុងផ្តល់សម្ភាសឱ្យក្រុមអ្នកសារព័ត៌មាន នាព្រឹកថ្ងៃទី៨មិថុនា ឆ្នាំ២០២៣
× ការទូទាត់ប្រាក់ឆ្លងដែន តាមរយៈការស្កេន QR Code នៅរវាងកម្ពុជា ថៃបានសរុប២៧លានបាត ស្មើប្រមាណ៣,១ពាន់លានរៀល។ ការប្រតិបត្តិការនេះ គឺមិនអស់ថ្លៃសេវា រួមទាំងមិនខាតអត្រាប្តូរប្រាក់នៅលើទីផ្សារ។ ពលរដ្ឋដែលប្រើប្រាស់អេស៊ីលីដាម៉ូបាល អាចសេ្កន QR Code សម្រាប់ការទូទាត់ចំណាយនានា នៅប្រទេសថៃ បានដល់ទំហំទឹកប្រាក់ ៥២លានរៀលក្នុងមួយថ្ងៃ។
កម្ពុជា និងថៃ បានដាក់ឲ្យប្រើប្រាស់នូវប្រព័ន្ធប្រតិបត្តិការទូទាត់ឆ្លងដែន តាមរយៈការស្កេន QR Code បានជាងរយៈពេល៣ឆ្នាំហើយ ពោលចាប់ពីខែកុម្ភៈ ឆ្នាំ២០២០មក។ ការដាក់ឱ្យដំណើរការនូវប្រព័ន្ធឌីជីថលនេះ បានធ្វើឲ្យអ្នកប្រើប្រាស់អេស៊ីលីដាម៉ូបាលនៅកម្ពុជា អាចស្កេនទូទាត់ប្រាក់នៅប្រទេសថៃ បានរហូតដល់៥២លានរៀលនៅក្នុងមួយថ្ងៃ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានបញ្ជាក់ថា ក្នុងចំណោមទឹកប្រាក់ទាំង៥២លានរៀលនេះ គឺពលរដ្ឋអាចស្កេនទូទាត់ចេញគណនីធនាគារ បានចំនួន៤០លានរៀល និងស្កេនចេញពីអេស៊ីលីដាម៉ូបាលបាន១២លានរៀល។ បើតាមលោកបណ្ឌិត អ៊ិន ចាន់នី ពលរដ្ឋដែលមានអេស៊ីលីដាម៉ូបាល អាចស្កេន ThaiQR (PromptPay)បានគ្រប់កន្លែង សម្រាប់ការទូទាត់ថ្លៃសេវា និងទំនិញនៅតាមហាង តាមផ្សារ ភោជនីយដ្ឋាន រួមទាំងមធ្យាបាយធ្វើដំណើរ និងការប្រើប្រាស់នានា ដោយមិនអស់ថ្លៃសេវា និងមិនមានការកំណត់។
«នៅពេលដែលយើងមានសេវាទូទាត់ឆ្លងដែននេះ គឺយើងអាចនាំប្រាក់រៀលទៅប្រើក្នុងទីផ្សារអន្តរជាតិ ដោយចាប់ផ្តើមអនុវត្តនៅប្រទេសថៃ។ ប្រាក់រៀលរបស់យើងអាចបានតម្លៃពេញលេញក្នុងការទូទាត់ទំនិញអន្តរជាតិបាននៅក្នុងប្រទេសថៃ ដែលនេះគឺជាកិតិ្តយសជាតិយើងមួយដែរ»។ នេះជាការលើកឡើងរបស់លោកបណ្ឌិត អ៊ិន ចាន់នី ដោយបន្តរៀបរាប់ថា គិតចាប់ពីខែកុម្ភៈ ឆ្នាំ២០២០ រហូតដល់ខែឧសភា ឆ្នាំ២០២៣ ចំនួនប្រតិបត្តិការទូទាត់ឆ្លនដែននេះ មានទៅដល់ ៩ ៥៥៥ ស្មើនឹងទំហំទឹកប្រាក់ប្រមាណ ២៧លានបាត (ប្រមាណ៣,១ពាន់លានរៀល)។
ការអនុវត្តការទូទាត់ប្រាក់ឆ្លងដែននេះ បានឈានចូលដល់ដំណាក់ទី២ ដែលត្រូវបានដាក់ឱ្យដំណើរការដោយធនាការជាតិនៃកម្ពុជា និងធនាគារជាតិថៃ កាលថ្ងៃទី៦មិថុនា ឆ្នាំ២០២៣។ ក្នុងដំណាក់កាលនេះ គឺពលរដ្ឋថៃអាចស្កេនឃ្យូអរកូត(QR Code)នៅកម្ពុជា បានផងដែរ។ បើតាមធនាគារជាតិ ការដាក់ឱ្យដំណើរការគម្រោងនេះ គឺមានអត្ថប្រយោជន៍ណាស់សម្រាប់លើកកម្ពស់ការទូទាត់រូបិយវត្ថុជាតិ។ លើសពីនេះ វាបានរួមចំណែកយ៉ាងសំខាន់ក្នុងការជំរុញបរិយាបន្នហិរញ្ញវត្ថុ សម្រួលការធ្វើពាណិជ្ជកម្មឆ្លងដែន និងកំណើនភ្ញៀវទេសចរទៀតផង។
ពេលពលរដ្ឋថៃដែលមកកម្ពុជាអាចទូទាត់ចំណាយនានា តាមរយៈការស្កេនលើKHQR នៃពាណិជ្ជកររបស់ធនាគារដែលជាសមាជិករបស់បាគង( Bakong)។ បច្ចុប្បន្ន ធនាគារដែលជាសមាជិកបាគងរបស់ធនាគារជាតិនៃកម្ពុជា(NBC) គឺមានចំនួន ៤៨ស្ថាប័ន៕
Tag:
ធនាគារ និងហិរញ្ញវត្ថុ
QR Code
FinTech
© រក្សាសិទ្ធិដោយ thmeythmey.com