ការរឹបអូសផ្ទះ ជាពិសេសអតិថិជនដែលបានបង់មួយចំនួនហើយ ត្រូវបានសម្តេច ហ៊ុន សែន លើកឡើងថា ជាករណីមិនត្រឹមត្រូវ ដោយសម្តេចស្នើឱ្យរៀបចំឥណទានឡើងវិញ រវាងម្ចាស់បុរី ជាមួយនឹងអ្នកទិញ។ «ជាផ្នែកមួយនៃយុត្តិធម៌សង្គម»។ សម្តេច បានបញ្ជាក់យ៉ាងដូច្នេះ ដោយបញ្ជាឱ្យលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ ក្រុមប្រឹក្សាអភិវឌ្ឍន៍កម្ពុជា (CDC) រៀបចំបញ្ជីឈ្មោះអ្នកដែលត្រូវបុរីរឹបអូសផ្ទះ។

 

ដោយសារតែអាជ្ញាធរមិនអាចកត់ត្រា និងដឹងពីចំនួនជាក់ស្តែង ប្រមុខរដ្ឋាភិបាលស្នើឱ្យពលរដ្ឋដែលត្រូវបានបុរីរឹបអូសផ្ទះ ទៅរាយការណ៍នៅ CDC។ សម្តេចបន្ថែមថា អ្នកខ្លះបង់បាន៥ម៉ឺនដុល្លារលើតម្លៃផ្ទះ១០ម៉ឺនដុល្លារ ហើយបែរជាត្រូវម្ចាស់បុរីរឹបអូស វាជារឿងអយុត្តិធម៌ ដែលសម្តេចត្រូវយកខ្លួនមកពាំង។

 

«ធ្វើបុណ្យជាតិនេះ កុំចាំជាតិក្រោយ»។ សម្តេចបាននិយាយបែបនេះ សំដៅទៅកាន់បណ្តាឧកញ៉ា ជាពិសេសម្ចាស់បុរី ឱ្យមានការយោគយល់ដល់អតិថិជន តាមរយៈការរៀបចំឥណទានឡើងវិញ៕