ហុងកុង (ចិន) និងសិង្ហបុរី គឺជាឈ្មោះទីក្រុងពីរដែលស្ថិតក្នុងបញ្ជីទីក្រុងថ្លៃបំផុតនៅអាស៊ីសម្រាប់ជនបរទេស។ ចំណាត់ថ្នាក់ទី៣ និង ៤ បានទៅលើទីក្រុង សេអ៊ូល និងតូក្យូ។ តាមពីក្រោយដោយ សៀងហៃ ក្វាងចូវ សេនចេន ប៉េកាំង តៃប៉ិ និង យូកូហាម៉ា។
ទីក្រុងដែលមានតម្លៃថ្លៃបំផុតនៅអាស៊ីសម្រាប់ជនបរទេសគឺហុងកុង។ មិនមានអ្វីគួរឱ្យភ្ញាក់ផ្អើលទេ ព្រោះទីក្រុងនេះបានជាប់ចំណាត់ថ្នាក់បួនឆ្នាំជាប់គ្នារួចមកហើយ ដោយឈរនៅលំដាប់កំពូលក្នុងបញ្ជីទីក្រុងថ្លៃបំផុតសម្រាប់ជនបរទេសនៅទូទាំងពិភពលោកផងដែរ។
លោក Lee Quane នាយកប្រចាំតំបន់អាស៊ីនៅអង្គការស្រាវជ្រាវ ECA International បានលើកឡើងថា ៖« តម្លៃទំនិញ និងសេវាកម្មនៅក្នុងទីក្រុងហុងកុងបានកើនឡើងដល់កម្រិតខ្ពស់បំផុតក្នុងរយៈពេលប៉ុន្មានឆ្នាំកន្លងមកនេះ។ ការវាយតម្លៃរបស់យើងគឺដោយសារតែការកើនឡើងនៃតម្លៃទំនិញ និងសេវាកម្មប្រចាំថ្ងៃ ប៉ុន្តែការជួលមានធ្លាក់ចុះ»។
កន្លែងដែលថ្លៃជាងគេទីពីរនៅអាស៊ីគឺសិង្ហបុរី ដែលកើនឡើងប្រាំបីចំណាត់ថ្នាក់បើធៀបឆ្នាំមុន។ ការស្ទង់មតិដោយ ECA International ក៏បានរកឃើញថា សិង្ហបុរីក៏ជាទីក្រុងដែលមានតម្លៃថ្លៃបំផុតទី ៥ នៅលើពិភពលោកផងដែរ ។ បើតាម ECA ការកើនឡើងនៃចំណាត់ថ្នាក់នេះគឺដោយសារតែមានការកើនឡើងយ៉ាងឆាប់រហ័សនៃថ្លៃស្នាក់នៅនៅសិង្ហបុរី។
របាយការណ៍ថ្មីៗនេះពីមជ្ឈមណ្ឌលលំនៅដ្ឋានអាស៊ីប៉ាស៊ីហ្វិកនៃវិទ្យាស្ថាន Urban Land បានរកឃើញថាអចលនទ្រព្យជួលឯកជននៅសិង្ហបុរីមានការជួលប្រចាំខែខ្ពស់បំផុតនៅអាស៊ីប៉ាស៊ីហ្វិកគឺ ២៦០០ដុល្លារ ដែលមានគម្លាតថ្លៃឆ្ងាយជាងទីក្រុងដទៃទៀត។
លោក Quane បានបន្តថា ការបន្ធូរបន្ថយការរឹតបន្តឹងកូវីដពីមុននៅសិង្ហបុរី បានជំរុញឱ្យមានតម្រូវការកន្លែងស្នាក់នៅរបស់ជនបរទេសខ្ពស់ជាងសមត្ថភាពផ្គត់ផ្គង់។ ស្ទើរតែទាំងអស់នៃទីតាំងអាស៊ីដែលត្រូវបានស្ទង់មតិបានធ្លាក់ចុះដោយសារអត្រាអតិផរណាទាបជាងបើប្រៀបធៀបទៅនឹងតំបន់ផ្សេងទៀត។
លក្ខណៈពិសេសគួរឱ្យកត់សម្គាល់មួយនៅក្នុងបញ្ជីនោះគឺថា ទីក្រុងរបស់ចិនដីគោកដូចជាទីក្រុងសៀងហៃ និងក្វាងចូវបានធ្លាក់ចេញពីចំណាត់ថ្នាក់កំពូលទាំង ១០ របស់ពិភពលោក ហើយបច្ចុប្បន្នត្រូវបានជាប់ចំណាត់ថ្នាក់ទី ១៣ និង ១៤ ជាទីក្រុងដែលថ្លៃបំផុតនៅលើពិភពលោកសម្រាប់ជនបរទេស។
ប្រាក់យ៉ន់ដែលធ្លាក់ចុះធៀបនឹងប្រាក់ដុល្លារនាំឱ្យការចំណាយទាបនៅក្នុងទីក្រុងនានារបស់ចិន ដែលធ្វើឱ្យតម្លៃនៃការរស់នៅកាន់តែថោក។ ទន្ទឹមនេះ ប្រាក់យ៉េនធ្លាក់ថ្លៃក៏បានរុញឱ្យទីក្រុងតូក្យូដែលជាប់ចំណាត់ថ្នាក់ទី ៥ នៅទូទាំងពិភពលោកក្នុងរយៈពេលប្រាំឆ្នាំចុងក្រោយនេះ បានធ្លាក់មកនៅចំណាត់ថ្នាក់ទី១០ផងដែរ។
ជារួមចំណត់ថ្នាក់ទីក្រុងដែលថ្លៃបំផុតទាំង ១០នៅអាស៊ីសម្រាប់បរទេសរួមាន ៖ ហុងកុង, សិង្ហបុរី, សេអ៊ូល, តូក្យូ, សៀងហៃ, ក្វាងចូវ, សេនចេន, ប៉េកាំង, តៃប៉ិ និងយូកូហាម៉ា។ នេះបើតាមទិន្នន័យពីអង្គការស្រាវជ្រាវ ECA International ៕