ថ្មីៗនេះ នៅលើបណ្ដាញសង្គម មានការជជែកគ្នាច្រើន លើករណីម្ចាស់ចម្ការ បង្ហោះវីដេអូបុរសម្នាក់ ដោយចោទថាចោរលួចទំពាំង។ ករណីនេះ លោក ឈត ប៊ុនថង យល់ថាជាករណីតូចតាចពុំគួរ បង្កឱ្យក្លាយជារឿងធំ​ឡើយ។ 

 

 

 

លោក ប៊ុនថង យល់ថាករណីខ្លះ ពុំគួរបង្ហាញមុខបុរសជនសង្ស័យទេ ព្រោះជាទូទៅសូម្បីតែជនបង្កហេតុ ឬជនសង្ស័យ ដែលសមត្ថកិច្ចឃាត់ក៏មិនត្រូវបានបង្ហាញមុខដែរ ដោយសារវាស្ថិតក្នុងករណីត្រឹមជាជនសង្ស័យ ដែលពុំទាន់មានការកាត់ក្ដីពីតុលាការឡើយ។ បើតាមលោក ប៊ុនថង បទល្មើសធ្ងន់ធ្ងរដែលអាចបង្កគ្រោះថ្នាក់ដល់សាធារណជនផ្សេងទៀត ទើបមានការផ្សព្វផ្សាយមុខជនសង្ស័យ ឬជនជាប់ទោស ដើម្បីឱ្យមានការប្រុងប្រយ័ត្ន។ 

 

យ៉ាងណាក្ដី រឿងរ៉ាវឈ្លោះតវ៉ាគ្នា និងបទល្មើសតូចតាចបែបនេះ អ្នកជំនាញផ្នែកសីលធម៌អប់រំរូបនេះ បានឱ្យយោបល់ថា គួរតែដំណោះស្រាយបែបសីលធម៌និងគុណធម៌ ក្នុងការរស់នៅប្រចាំថ្ងៃវិញ តាមរយៈការសម្របសម្រួលគ្នា។ ជាងនេះទៅទៀត អ្នកប្រើប្រាស់បណ្ដាញសង្គម ត្រូវការយល់ដឹងបន្ថែមពី អ្វីទៅជាសិទ្ធិឯកជន សិទ្ធិផ្សព្វផ្សាយរូបភាព និងសិទ្ធិផ្សាយព័ត៌មានជាដើម។