សេដ្ឋកិច្ច
អន្តរជាតិ
TikTok នឹងវិនិយោគថវិកា១២លានដុល្លារ ដើម្បីលើកកម្ពស់អាជីវកម្មខ្នាតតូចជាង ១២ម៉ឺនកន្លែងនៅអាស៊ីអាគ្នេយ៍
× ហ្សាការតា, ឥណ្ឌូណេស៊ី៖ ក្រុមហ៊ុន តិកតុក បានប្រកាសពីការវិនិយោគថ្មីក្នុងទំហំទឹកប្រាក់រាប់លានដុល្លារ ដើម្បីជួយដល់ការធ្វើអន្ដរកម្មអាជីវកម្មលើអនឡាញជាង ១២ម៉ឺនអាជីវកម្មខ្នាតតូច និងមធ្យម និងចូលរួមក្នុងសេដ្ឋកិច្ចឌីជីថល។ ការវិនិយោគទឹកប្រាក់ប្រមាណ ១២,២ លានដុល្លារ នឹងត្រូវធ្វើឡើងសម្រាប់ជាជំនួយសាច់ប្រាក់ ក្នុងការបណ្ដុះបណ្ដាលជំនាញឌីជីថល និងឥណទានផ្សព្វផ្សាយពាណិជ្ជកម្មសម្រាប់ SMEs នៅតាមជនបទ និងជាយក្រុង។
ក្រុមហ៊ុន តិកតុក បានរៀបចំវេទិកាមួយស្ដីពីឥទ្ធិពលរបស់តិកតុក ក្នុងតំបន់អាស៊ីអាគ្នេយ៍ នាទីក្រុងហ្សាការតា ប្រទេសឥណ្ឌូណេស៊ី នៅថ្ងៃទី១៥ មិថុនានេះ។ វេទិកានេះ មានការចូលរួមពីមន្ត្រីពាក់ព័ន្ធ នៅក្នុងតំបន់អាស៊ីអាគ្នេយ៍រួមទាំងកម្ពុជាផងដែរ។
ក្នុងវេទិកាខាងលើ ក្រុមហ៊ុន តិកតុក បានប្រកាសពីការវិនិយោគថ្មីក្នុងទំហំទឹកប្រាក់រាប់លានដុល្លារ ដើម្បីជួយដល់ការធ្វើអន្ដរកម្មអាជីវកម្មលើអនឡាញជាង ១២ម៉ឺនអាជីវកម្មខ្នាតតូច និងមធ្យម (SMEs) និងចូលរួមក្នុងសេដ្ឋកិច្ចឌីជីថល។ ការវិនិយោគនេះ កើតចេញជារូបរាងដោយសារតែ តិកតុក បានក្លាយជាបណ្ដាញសង្គមដ៏មានលេចធ្លោសម្រាប់អាជីវកម្ម និងអ្នកបង្កើតមាតិកា។
របាយការណ៍នៃការបង្កើនល្បឿនអាជីវកម្ម ការអប់រំ និងសហគមន៍នៅតំបន់អាស៊ីអាគ្នេយ៍ អាជីវកម្មខ្នាតតូច និងមធ្យម (SMEs) ដែលបានស្ទង់មតិបង្ហាញថា អ្នកបង្កើតមាតិកាបានបង្កើនប្រាក់ចំណូលជិត ៥០ ភាគរយ តាមរយៈការលក់ផលិតផល និងផ្ដល់សេវាកម្មរបស់ពួកគេនៅលើ TikTok ។ លើសពីនេះ មានជិតបួនភាគប្រាំនៃអាជីវកម្ម (៧៩ ភាគរយ) បានផ្លាស់ប្តូរពីក្រៅបណ្តាញទៅកាន់បណ្តាញទីផ្សារអនឡាញដោយប្រើប្រាស់ប្លេតហ្វមវីដេអូខ្លីៗនេះ។ បន្ថែមលើនេះ មានជាង ៨០ ភាគរយ នៃអ្នកបង្កើតមាតិកា TikTok ដែលត្រូវបានស្ទង់មតិ បានបង្កើនប្រាក់ចំណូលរបស់ពួកគេតាមរយៈមធ្យោបាយនានា ដូចជា TikTok LIVE និងការឧបត្ថម្ភពីម៉ាកយីហោផ្សេងៗ។
លោក Shou Chew នាយកប្រតិបត្តិ TikTok លើកឡើងថា នៅទូទាំងតំបន់អាស៊ីអាគ្នេយ៍ មនុស្សជាង ៣២៥ លាននាក់ប្រើប្រាស់ TikTok ជារៀងរាល់ខែ ហើយប្រតិបត្ដិការអាជីវកម្មចំនួន ១៥ លានបានប្រើប្រាស់ប្លេតហ្វមនេះ។ នាយកប្រតិបត្តិរូបនេះ បន្តយ៉ាងដូច្នេះ៖ «សកម្មភាពដែលយើងបានធ្វើក្នុងការពង្រីកឱកាសសេដ្ឋកិច្ច ការអប់រំ និងការកសាងសហគមន៍នៅក្នុងតំបន់នេះ និងជុំវិញពិភពលោកគឺពិតជាធំធេងណាស់។ យើងមានសេចក្តីរំភើបរីករាយដែលបានឃើញឥទ្ធិពលជាវិជ្ជមានរបស់ TikTok ហើយយើងបន្ដប្តេជ្ញាជួយដល់បុគ្គល សហគមន៍ និងអាជីវកម្មដទៃទៀតឱ្យរីកចម្រើន និងរឹងមាំផងដែរ»។
របាយការណ៍នៃការបង្កើនល្បឿនអាជីវកម្ម ការអប់រំ និងសហគមន៍នៅតំបន់អាស៊ីអាគ្នេយ៍ អាជីវកម្មខ្នាតតូច និងមធ្យម (SMEs) ក៏បានបង្ហាញពីភាពជោគជ័យរបស់កសិករកម្ពុជាម្នាក់ ដែលប្រើប្រាស់តិកតុក សម្រាប់ធ្វើអាជីវកម្ម។ ក្នុងរបាយការណ៍នោះ ដកស្រង់សម្ដីកសិករកម្ពុជា គឺលោក យ៉ាន់ ពិសិដ្ឋយ៉ាងដូច្នេះ៖ «មនុស្សជាច្រើនបានទាក់ទងមកខ្ញុំ បន្ទាប់ពីឃើញខ្ញុំនៅលើតិកតុក ដើម្បីទិញកូនបង្គា»។
សូមបញ្ជាក់ថា ក្រៅពីគិតគូរលើអាជីវកម្ម តិកតុក ក៏បានចូលរួមចំណែកដល់ការពង្រីកលទ្ធភាពទទួលបានការអប់រំ និងការកែលម្អខ្លួនឯង, កសាងសហគមន៍សម្រាប់ការគាំទ្រ និងអភិវឌ្ឍន៍ និងការពង្រឹងធនធានបញ្ញាវន្ដ។ បច្ចុប្បន្ន តិកតុក មានបុគ្គលិកជាង ៧៥០០ នាក់នៅទូទាំងតំបន់អាស៊ីអាគ្នេយ៍ ដោយតិកតុក ប្តេជ្ញាចិត្តវិនិយោគលើការអភិវឌ្ឍធនធានបញ្ញាវន្ដក្នុងស្រុកផងដែរ៕
© រក្សាសិទ្ធិដោយ thmeythmey.com