កញ្ចប់​ជំនួយ​​២​លាន​ដុល្លារ ដែលកម្ពុជាទទួលបាន​ពី​មូលនិធិ​ពិសេសសម្រាប់គម្រោងកិច្ចសហ​​ប្រតិបត្តិការ​មេគង្គ​-​ឡាន​ឆាង​សម្រាប់​ឆ្នាំ២០២៣ ត្រូវបានចុះហត្ថលេខាដោយ លោក ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ​ ជាមួយលោក ​វ៉ាង វិ​ន​ធាន ​(WANG Wentian) ឯកអគ្គរដ្ឋទូត​ចិន​ប្រចាំ​កម្ពុជានៅទីស្តីការក្រសួង នាថ្ងៃទី ​១៥មិថុនា។ 

 

បើតាមលោក វ៉ាង វិ​ន​ធាន រយៈពេល៦ឆ្នាំមកនេះ មូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង បានផ្តល់ហិរញ្ញវត្ថុដល់គម្រោងចំនួន៨៩នៅកម្ពុជា ដែលផ្តល់នូវអត្ថប្រយោជន៍ជាក់ស្តែងជាច្រើន ដល់ប្រជាជនកម្ពុជានិងប្រជាជនក្នុងតំបន់។ យោងតាមការចុះផ្សាយរបស់ស្ថានទូតចិនប្រចាំកម្ពុជា ការអនុវត្តគំនិតផ្តួចផ្តើមសហការទាំងនេះ បានបង្ហាញពីការបន្តប្តេជ្ញាចិត្តរបស់កម្ពុជា និងចិន ដើម្បីរួមចំណែកដល់ការកសាងសហគមន៍វាសនារួមនៃសន្តិសុខ វិបុលភាព និងការអភិវឌ្ឍប្រកបដោយចីរភាព សម្រាប់បណ្តាប្រទេសមេគង្គ-ឡានឆាងទាំងអស់។​

 

ជាមួយគ្នានេះលោក ប្រាក់ សុខុន​ បានលើកឡើងថា កិច្ចសហប្រតិបត្តិការឡានឆាង-មេគង្គ បានបង្កើតមូលនិធិពិសេសមុនគេបង្អស់ក្នុងចំណោមយន្តការកិច្ចសហប្រតិបត្តិការជាច្រើននៅក្នុងអនុតំបន់ទន្លេមេគង្គ ទទួលបានការវាយតម្លៃខ្ពស់និងមានក្តីរំពឹងទុកពីប្រទេសនៅក្នុងតំបន់។ លោកបានបញ្ជាក់ថា រយៈពេល៦ឆ្នាំមកនេះ ប្រទេសឡានឆាង-មេគង្គទាំង៦បានចាត់ទុកការអភិវឌ្ឍន៍ជាអាទិភាពទីមួយ និងសម្រេចបានសមិទ្ធផលជាច្រើនគួរឱ្យកត់សម្គាល់នៅក្នុងកិច្ចសហប្រតិបត្តិការលើវិស័យ។ ដូចជា៖ ការកាត់បន្ថយភាពក្រីក្រ សុខាភិបាល អប់រំ ព័ត៌មាន ទេសចរណ៍ វប្បធម៌ កសិកម្ម ការការពារបរិស្ថាន និងការពង្រឹងសិទ្ធិស្ត្រីជាដើម៕